मोरङको रंगेलीस्थित संसारीमाई मन्दिरबाट मूर्ति र गरगहना चोरी
२० पौष, काठमाडौं । मोरङको रंगेली नगरपालिका–७ मा अवस्थित धार्मिक महत्त्वको संसारीमाई मन्दिरमा चोरी भएको छ। जिल्ला प्रहरी कार्यालय मोरङका अनुसार शनिवार राति अज्ञात समूहले मन्दिरको च्यानल गेटमा लगाइएको ताल्चा फोडी देवीदेवताका मूर्ति, गरगहना तथा दानपेटिका चोरी गरेका हुन् ।
संसारी माताका दुईवटा मूर्ति, ठूलो मूर्तिमा चढाइएका चाँदीका गरगहना तथा दानपेटिकाको सिसा फोडी त्यसभित्र रहेको नगद चोरी भएको मोरङ प्रहरी प्रवक्ता प्रहरी नायब उपरीक्षक कोपिला चुँडालले बताउनुभयो । उहाँका अनुसार दानपेटिकामा कति रकम थियो भन्ने भने विषयमा यकिन भइसकेको छैन ।
प्रहरीका अनुसार मन्दिर परिसरमा जडान गरिएको सिसिटिभी क्यामेरालाई छल्दै चोरी गरिएको देखिन्छ ।
हाल इलाका प्रहरी कार्यालय रंगेलीका प्रहरी निरीक्षक नरेन्द्रकुमार बोगटीको नेतृत्वमा अनुसन्धान सुरु गरिएको छ । हालसम्म चोरीमा संलग्न व्यक्तिहरूको पहिचान हुन नसकेको प्रहरीले जनाएको छ ।
अनुसन्धानका क्रममा प्रहरीले मन्दिर परिसरको मुचुल्का उठाउने, क्षतिग्रस्त ताल्चा तथा दानपेटिकाको अवस्था निरीक्षण गर्ने, सम्भावित चोरीको समय र तरिका पहिचान गर्ने काम गरिरहेको छ।
