काठमाडौँ। 'नेपाल प्रथम' राष्ट्रिय अभियानले आगामी प्रतिनिधि सभा निर्वाचन २०८२ लाई लक्षित गर्दै "निर्वाचन जनता र राष्ट्रका लागि" नामक विशेष अभियानको शुभारम्भ गरेको छ। अभियानका राष्ट्रिय संयोजक नारायण प्रसाद ढकालले एक प्रेस विज्ञप्ति जारी गर्दै यस नयाँ कार्यक्रमबारे जानकारी दिनुभएको हो।
प्रेस विज्ञप्तिमा उल्लेख भएअनुसार, 'नेपाल प्रथम' अभियानको मुख्य उद्देश्य हरेक क्षेत्रमा नेपाललाई प्रथम स्थानमा पुर्याउनु र नेपालीहरूको इमानदारिता तथा सृजनशील क्षमतालाई रचनात्मक कार्यमा लगाउनु रहेको छ। अभियानले शिक्षा, स्वास्थ्य, प्रशासन, राजनीति र विज्ञान जस्ता क्षेत्रमा नेपाललाई आत्मनिर्भर र प्रेरणादायी राष्ट्र बनाउने लक्ष्य लिएको छ।
विगतमा भएका युवा आन्दोलनहरूको जगमा उभिएर यो अभियानले आगामी निर्वाचनलाई स्वच्छ, निष्पक्ष र जनअपेक्षा अनुरूप सम्पन्न गराउन नागरिक सक्रियतामा जोड दिएको छ। विज्ञप्तिमा उल्लेख भएअनुसार, राजनीतिक दलहरूले घोषणा पत्र निर्माण गर्दा जनताको वास्तविक इच्छा र आवश्यकतालाई समावेश गराउन अभियानले सुझाव दिने कार्य सम्पन्न गरिसकेको छ। चुनावमा उठ्ने प्रत्याशीहरूलाई राष्ट्र र जनताप्रति जिम्मेवार बनाउन र उनीहरूमा दायित्वबोध गराउन यो अभियानले निरन्तर काम गर्ने जनाइएको छ। त्यस्तै, निर्वाचन पश्चात् पनि सामाजिक प्रहरीको भूमिकामा रहेर सुशासन, उत्तरदायित्व र नागरिक सचेतनाका लागि निरन्तर खबरदारी र अनुगमन गरिने संयोजक ढकालले बताउनुभएको छ।
यो अभियान देशका ७ वटै प्रदेश र ७७ वटै जिल्लामा चरणबद्ध रूपमा सञ्चालन गरिने जानकारी दिइएको छ। व्यक्तिगत स्वार्थ भन्दा माथि उठेर "जनता र राष्ट्रका लागि" निर्वाचन हुनुपर्छ भन्ने मान्यतालाई स्थापित गर्नु नै यसको मूल मर्म रहेको विज्ञप्तिमा उल्लेख छ।
अभियानले यस राष्ट्रिय महत्त्वको कार्यमा सबै सरोकारवाला, सञ्चारकर्मी र आम नागरिकहरूलाई सक्रिय सहयोग र सकारात्मक भूमिकाका लागि हार्दिक अपिल समेत गरेको छ।
संयोजकको सम्बोधन : संयोजकद्वारा गरिएको सम्बोधनको भिडियो
