२० कार्तिक, काठमाडौं । अखिल नेपाल फुटबल संघ (एन्फा) मुख्यालयमा प्रदर्शन गर्न उत्रिएका खेलाडीहरूले गेटमै मेडल झुन्ड्याएका छन् ।
ए डिभिजन लिग यस वर्ष नगरी अर्को वर्ष मात्र गर्ने निर्णयविरुद्ध नेपाल फुटबल खेलाडी संघको आयोजनामा खेलाडीहरूले सातदोबाटोस्थित एन्फा मुख्यालय पुगेर प्रदर्शन गरेका हुन् ।
खेल्न पाउने आफ्नो आधारभूत हकका लागि सडकमा आउन बाध्य भएको संघले जनाएको छ ।
खेलाडी संघका अध्यक्ष विक्रम लामाले भने, "अब यो मेडल एन्फाले आफैँ आएर लाओस् । हामीले यही छाडेर जान्छौँ ।"
पटक–पटक लिग स्थगित नगर्न भने पनि बेवास्ता गरिएपछि प्रदर्शनमै उत्रिनुपरेको खेलाडीको भनाइ छ ।
प्रदर्शनमा ‘एन्फा फुटबल एशोसिएशन की कन्सलटेन्सी’, ‘विश्वकप त चार वर्षमा आउँछ, ए डिभिजन कहिले आउँछ ?’, ‘नो गेम, नो फ्रेमः एन्फाज टु ब्लेम’, ‘घरेलु लिग चलाउः फुटबल बचाउ’, ‘वाक्क लाग्दो एन्फाः दिक्क लाग्दो नेपाली फुटबल’, ‘फुटबल क्यालेण्डरमा होइन, ग्राउण्डमा चाहियो’ लगायतका नारासहितका प्लेकार्ड छन् ।
एन्फाले यस वर्ष पुसमा राष्ट्रिय लिग गरेर अर्को वर्षको पुसमा मात्र ए डिभिजन लिग फुटबल सुरु गर्ने निर्णय गरेको छ ।


