आज मोक्षदा एकादशी एवं गीता जयन्ती
१५ मंसिर, काठमाडौं । मार्गशीर्ष शुक्ल एकादशीको पावन दिन मोक्षदा एकादशीसँगै विश्वभरि गीता जयन्ती श्रद्धा, भक्ति र उत्साहपूर्वक मनाइन्छ ।
महाभारत युद्धका क्रममा कुरुक्षेत्रमा कर्तव्यबाट विचलित भएका अर्जुनलाई भगवान् श्रीकृष्णले आजकै दिन गीताको दिव्य उपदेश दिनुभएको थियो ।
भगवद्गीता हिन्दू धर्मको सर्वाधिक लोकप्रिय ग्रन्थ हो । श्रीमद्भागवतलाई ज्ञान, भक्ति र तत्त्वचिन्तनको अद्वितीय स्वरूपका रूपमा अवलोकन गरिन्छ । वर्तमान समयमा भगवद्गीता मानव जीवनको प्रेरणास्रोत बनेको छ । अर्जुनलाई माध्यम बनाई भगवान् श्रीकृष्णले कर्मयोग, भक्तियोग, ज्ञानयोग तथा स्वधर्म आचरणका सिद्धान्त स्थापित गर्नुभएको गीता जीवन–निर्देशक दर्शनका रूपमा रहेको छ। यहाँ उल्लेखित सिद्धान्त सर्वकालीन, सार्वजनीन् एवं सार्वभौम छन्, जुन मानवको कल्याणका लागि अपरिहार्य छन् ।
गीता जयन्तीका अवसरमा आज विश्व हिन्दु महासंघलगायत विभिन्न धार्मिक संस्थाले कार्यक्रम आयोजना गर्दै छन्। गीता प्रादुर्भावको स्मरणार्थ देश–विदेशमा पाठपारायण, प्रवचन तथा विविध आध्यात्मिक कार्यक्रम गरी आजको दिन उल्लासपूर्वक मनाइँदै छ।