२८ मंसिर, काठमाडौं । जुम्लामा उत्पादन हुने अर्गानिक रैथाने बालीबाट बन्ने परिकारको एक दिने मेला सम्पन्न भएको छ । रैथाने बालीबाट बनेका परिकार र यसको महत्वका बिषयमा उजागार गर्न कृषि जैविक विविधता र खाद्य परिकार प्रदर्शनी मेला आयोजना गरिएको हो ।
जिल्ला खेलकुद विकास समितिको प्राङ्गणमा आयोजना गरिएको मेलामा अर्गानिक खाद्यन्न, परिकार, औषधीजन्य गुण भएका जडीबुटीदेखि रैथाने बालीबाट बनेका विभिन्न परिकारको प्रदर्शनी गरिएको हो ।
मेलाको जिल्ला समन्वय समितिका प्रमुख गौरीनन्द आचार्यले स्थानीय अर्गानिक पिठोको सेलरोटी हालेर मेलाको सुरुवात गर्नुभएको थियो । उहाँका अनुसार रैथानेबाली अहिले लोप हुने अवस्थामा छ । बाहिरबाट आउने विषादी मिसावट भएको खाद्यन्न खाइरहेका छौं । यो प्रदर्शनी किसानलाई रैथाने बालीको उत्पादन गर्न हौसला दिने विश्वास छ । किसानले उत्पादन गर्ने, स्थानीय सरकारले बजार खोज्ने र व्यापारीले बजारमा लैजाने वातावरण सिर्जना गर्न प्रदर्शनीले महत्वपूर्ण योगदान पुर्याउने उहाँले विश्वास व्यक्त गर्नुभयो ।
रैथाने परिकारको प्रदर्शनको क्रममा स्थानीय महिला समूहबाट देउडा प्रतियोगिता गरिएको थियो । देउडा मार्फत रैथाने परिकार, पोषिलो तथा अर्गानिक खानाका विषयमा सन्देश दिइने काम गरिएको थियो ।
चन्दननाथ नगरपालिका जुम्लाको आयोजना तथा जिल्ला कृषि विकास कार्यालय जुम्लाको समन्वयमा यहाँ उत्पादन हुने पोषिला रैथाने अर्गानिक वस्तुको उत्पादन, संरक्षण, प्रवर्धन र बजारीकरणमा थप सहज गर्न मेलाको आयोजना गरिएको जिल्ला कृषि विकास कार्यालय जुम्लाका प्रमुख रामभक्त अधिकारीले जानकारी दिनुभयो ।
सो अवसरमा जिल्ला समन्वय प्रमुख आचार्यसहित चन्दननाथ नगरपालिकामा नगरप्रमुख राजुसिंह कठायत, उपप्रमुख रामदेवी खड्का सहित सरोकारवाला निकाय र स्थानीयले मेलाको अवलोकन गरेका थिए ।
