हिन्दू स्वयंसेवक संघ नेपाल, काठमाडौंले साँखुस्थित शालिनदी किनारमा भव्यताका साथ मकर सङ्क्रान्ति उत्सव मनाएको छ।
कार्यक्रमका प्रमुख वक्ता श्री रेवित कुमारले हिन्दू समाज उत्सवप्रिय रहेको चर्चा गर्दै एक्लै नभई सामूहिक र सामाजिक रूपमा आनन्द मनाउनु नै हिन्दू संस्कृतिको विशेषता रहेको बताउनुभयो। उहाँले 'क्रान्ति' र 'सङ्क्रान्ति' बीचको भेद प्रष्ट पार्दै भन्नुभयो, "विश्वका ठूला राजनीतिक क्रान्तिहरूमा हिंसा र विनाश धेरै भए, तर सङ्क्रान्ति भनेको 'सम्यक्' अर्थात् सकारात्मक र शुभ परिवर्तन हो।"
बौद्धिक उद्बोधनका क्रममा उहाँले आज हिन्दू समाजमा आवश्यक पाँच वटा मुख्य विषयहरूमा जोड दिनुभयो। विगतमा पुर्खाहरूले धर्मका लागि बलिदान दिएको स्मरण गर्दै, वर्तमान समयमा धर्म र संस्कृतिको रक्षाका लागि मर्ने होइन, 'जिउनुपर्ने' आवश्यकता रहेको उहाँले बताउनुभयो। उहाँले परिवारमा नयाँ पुस्तालाई संस्कार हस्तान्तरण गर्न र कम्तीमा दिनको केही समय धर्म-संस्कृतिको चर्चा गर्न आग्रह गर्नुभयो।
त्यस्तै, जन्मका आधारमा कोही पनि सानो वा ठूलो नहुने बताउँदै उहाँले वाल्मीकि र वेद व्यासको उदाहरण प्रस्तुत गर्नुभयो। रावण ब्राह्मण कुलको भएर पनि राक्षस कहलिएको तर वाल्मीकि र व्यास कर्मले पूजनीय भएको भन्दै उहाँले जातीय विभेद अन्त्य र 'स्व' (आफ्नोपन) को गौरवमा जोड दिनुभयो। प्रकृतिलाई माता मान्ने संस्कृति अनुसार प्लास्टिकको प्रयोग घटाउन, जल संरक्षण गर्न र एक असल नागरिकका रूपमा राष्ट्रिय कर्तव्य पूरा गर्न उहाँले आह्वान गर्नुभयो।
कार्यक्रममा शंखरापुर नगरपालिका वडा नं ६ का अध्यक्ष एवं प्रवक्ता श्री राधाकृष्ण श्रेष्ठ, गुह्येश्वरी मन्दिरका पुजारी श्री राजेशमान कर्माचार्य, ज्येष्ठ नागरिक सरोकार समितिका वडा अध्यक्ष श्री गणेश पोखरेल र राष्ट्रिय सिँचाइ उपभोक्ता महासंघका केन्द्रीय अध्यक्ष श्री शम्भु दुलालको उपस्थिति रहेको थियो।
कार्यक्रमको अन्त्यमा उपस्थित सबैले सामूहिक खिचडी प्रसाद ग्रहण गरियो।
