चैत्र २५, काठमाडौं । ऐतिहासिक, धार्मिक र पुरातात्विक महत्व बोकेको टोखामा तीनदिने ‘पाँहाचह्रे’ जात्रा प्रारम्भ भएको छ। नेवार समुदायको बाहुल्यता रहेको टोखामा यही चैत २५ देखि २७ सम्म गरी तीन दिन ‘पाँहाचर्हे’ जात्रा मनाउन लागिएको हो।
जात्राका क्रममा टोखाका नेवार समुदायले पाहुना बोलाएर मीठो खुवाउने प्रचलन रहेको नेवाः गुथि टोखाका अध्यक्ष रमेश नापितले बताए ।
आज पिचास चर्तुदशीका दिन बिहान ६ः३० बजे लिङ्ग (यँसि) उठाएर र साँझ ६ः३० बजे सपन विनायक र सङ्कटा अजिमाका दुई रथलाई गाउँ परिक्रमा गराइदैछ । परिक्रमाका क्रममा जहाँ–जहाँ महादेव लुकेर बसेका छन्, त्यहाँ पुर्याई दर्शन गराई फर्काउने चलन रहेको टोखाका मूल नाइके हेमराज श्रेष्ठले बताए।
भोली घोडेजात्राका दिन साँझ ६ः३० बजे सपन विनायनको रथलाई सपनतीर्थमा लैजाने, सङ्कटाको रथलाई तरख्यःमा ल्याई ६ कुमार र चार कुमारीलाई मरजा (भात) खुवाउने र दुई कुमारलाई मरजा खुवाउने प्रचलन छ।
सपनतीर्थको रथलाई नात्येश्वर र सङ्कटाको रथलाई थलाग टोलमा बिसाइन्छ। सोही रात भजनकीर्तन गर्ने र जाग्राम बस्ने चलन रहेको छ।
जात्राको अन्तिम दिन बिहान ६ः३० बजे सपनतीर्थको रथ नात्येश्वरबाट र सङ्कटाको रथ थलाग टोलबाट बाजागाजासहित कपडा बिच्छ्याएर थलागटोलमा रहेको पाँचवटा प्वाल भएको ढुङ्गा (न्या प्वाय ल्हो) मा लगेर सपनविनायकले सङ्कटालाई तीनपटक ढोगाउने चलन छ।
त्यसपछि सङ्कटा अगाडि र सपनविनायकको रथ पछाडि बसेर लिङ्गेश्वरलाई तीनपटक परिक्रमा गरी जात्रा समापन गरिन्छ।