चैत्र २२, काठमाडौं । काठमाडौं महानगरपालिका शिक्षा विभागले महानगरपालिका अन्तर्गतका संस्थागत विद्यालयलाई मौलिकता, नेपालीपन झल्कने गरी विद्यालयको नामकरण गर्न आग्रह गरेको छ । शिक्षा विभागले एक सार्वजनिक सूचना प्रकाशित गर्दै महानगरपालिकाअन्तर्गतका संस्थागत विद्यालयलाई नेपालीपन झल्कने गरी विद्यालयको नामकरण गर्न आग्रह गरेको हो ।

विदेशको जस्तै शिक्षा दिने बहानामा ‘इन्टरनेसनल’ शब्द झुन्ड्याइरहेका काठमाडौं महानगरपालिकाभित्रका निजी विद्यालयलाई नामअनुसार काम गर्न वा नाम सच्याउन महानगरले एक साता समयसीमा तोकेको छ ।

सात दिनभित्रमा सम्पर्क गरी मौलिक नामकरणको प्रक्रिया अगाडि नबढाएमा, नियमावलीविपरीत नाम सच्याउन अटेर गर्नेलाई कारबाहीस्वरूप विद्यार्थी भर्ना कार्यक्रम नै रोकिदिने महानगरको चेतावनी छ ।

महानगरपालिका विद्यालय शिक्षा व्यवस्थापन नियमावली, २०७४ अनुसार निजी विद्यालयले ‘इन्टरनेसनल’ शब्द राख्न एकतिहाइ विदेशी विद्यार्थी पढाउनुपर्छ, ‘नेसनल’ शब्द राख्न २५ जिल्लाका विद्यार्थी हुनैपर्छ र ‘पब्लिक’ शब्द राख्न कुल विद्यार्थीमध्ये एकतिहाइले पूर्ण छात्रवृत्ति पाएको हुनुपर्छ । तर, कुनै पनि विद्यालयले नियमावलीअनुसार काम नगरेको भन्दै महानगरले त्यस्ता शब्द हटाउन बुधबार सूचना जारी गरेको हो । 

महानगरपालिकाले शैक्षिक वर्ष ०७९ को भदौदेखि नै ‘इन्टरनेसनल, नेसनल र पब्लिक’ शब्द हटाउन ताकेता गरेको हो । तर, हालसम्म केहीले मात्रै नाम नेपालीकरण अर्थात् सच्याएका छन्, अन्यले अटेर गर्दै आइरहेका छन् । अब भने महानगरले ती निजी विद्यालयलाई नाम नसच्याए छुट दिनेछैन ।

शिक्षा व्यवस्थापन नियमावली, १०७४ अनुसार दुई वर्षभित्र नै सबै विद्यालयले नाम सच्याइसक्नुपर्ने थियो । तर, नियमावली बनेको ६ वर्षसम्म पनि कार्यान्वयन हुन सकेको छैन । नियमावलीमै स्पष्ट उल्लेख भएकाले त्यसको कार्यान्वयन गर्न लागिएको महानगरका प्रवक्ता नवीन मानन्धरले जानकारी दिए । निजी विद्यालयले नाम सच्याउन कम्पनी रजिस्ट्रारको कार्यालयमा जानुपर्नेछ भने उनीहरूले होर्डिङ बोर्ड, डिस्प्ले, प्रशासनिक कागजातलगायतमा पनि नाम सच्याउनुपर्नेछ । यदि ती शब्द राख्ने भए मापदण्ड पूर्ण पालना गर्नुपर्नेछ । त्यस्तै, यसअघिको संघीय शिक्षा ऐनले पनि विद्यालयको नामकरणमा मौलिकता र नेपालीपन झल्कने किसिमको हुनुपर्ने व्यवस्था गरेको छ ।