चैत्र २३, काठमाडौं । गुल्मीमा मैत्री यातायात प्रालिले विद्युतीय सवारीसाधन सञ्चालनमा ल्याएको छ ।
मैत्री यातायात्र प्रालिका अध्यक्ष शंकरप्रसाद गौतमका अनुसार गुल्मी जिल्लाको ग्रामीण बस्ती सिमलटारीबाट पाल्पा, बुटवलसम्मका लागि छुट्ने गरि जिल्लामा १० वटा विद्युतीय गाडी सञ्चालनमा ल्याएको हो।
जिल्ला समन्वय समिति गुल्मीका प्रमुख द्रोणबहादुर खत्रीले बिहीबार मैत्री यातायात सेवाको शुभारम्भ गरेका हुन् ।खत्रीले वातावरणमैत्री गाडी सञ्चालनमा ल्याएकोमा नागरिकलाई सहज सेवा दिन आग्रह गरे । विद्युतीय गाडी भित्रिएसँगै यात्रुलाई पनि भाडामा राहत हुने भएकाले स्तरीय सेवा प्रदान गर्नुपर्नेमा उनले जोड दिए।
मैत्री यातायात प्रालिले एक महिनादेखि विद्युतीय गाडी परीक्षणका रुपमा सञ्चालन गरेर बिहीवारबाट औपचारिक रुपमा सञ्चालनमा आएको जनाएको छ।
हरेक विद्युतीय गाडी १४ सिट क्षमताका रहेका छन्। तम्घासदेखि बुटवलसम्मको भाडा प्रतिव्यक्ति ५६५ रुपैयाँ कायम गरिएको गौतमले बताए।
विद्युतीय गाडीमा कायम गरिएको भाडा डिजेल गाडीको तुलनामा २५ प्रतिशतसम्म सस्तो रहेको मैत्री यातायात प्रालिले जनाएको छ। विद्युतीय गाडीको लागि मैत्री यातायात प्रालिले गुल्मीको तम्घास, रिडीमा चार्जिङ स्टेशन बनाएको छ।
विद्युतीय गाडीमा सीसीटीभी, क्यामेरा, वाईफाई, जीपीएससमेत जडान गरिएको छ।
गुल्मी तम्घासबाटै आँगन सेवा यातायात प्रालिले पनि १५ वटा विद्युतीय गाडी सञ्चालन गर्दै छ। कम्पनीका सञ्चालक किरण कुँवरका अनुसार गाडीहरू बुकिङ भइसकेकाले केही समयमै सेवा प्रारम्भ हुनेछ।