वैशाख ४, काठमाडौं । हरेक वर्ष चैत शुक्ल अष्टमीदेखि दशमीसम्म तीन दिन मनाइने सेतो मच्छिन्द्रनाथको जात्रा आजदेखि शुरु भएको छ । सेतो मच्छिन्द्रनाथको रथयात्रा वर्षा र सहकालका देवता मानिने आर्याअवलोकितेश्वरको मुर्तिको रथयात्रा गरी मनाइने जात्रा हो।

साँझ ५ बजे जमलस्थित तीनधारा पाठशालाबाट सेतो मच्छिन्द्रनाथको रथयात्रा सुरु हुने छ । जात्राको पहिलो दिन आज सेतो मच्छिन्द्रनाथको मूर्तिलाई रथमा राखी जमलबाट विभिन्न टोल हुँदै असन पुर्‍याएपछि बलि दिएर पूजा गर्ने परम्परा छ ।

नवमीका दिन असनबाट रथ तानेर हनुमानढोकाको कालभैरव पुर्‍याइन्छ । चैत शुक्ल दशमीका दिन हनुमानढोकाबाट विभिन्न टोल हुँदै रथ तानेर लगनटोल पुर्‍याएपछि रथयात्रा सम्पन्न हुन्छ । त्यसपछि मच्छिन्द्रनाथको मूर्तिलाई रथबाट ओराली खटमा बोकी विभिन्न टोलको परिक्रमा गराई जनबहालमा रहेको मन्दिरमा पुर्‍याएपछि जात्रा सकिने प्रचलन छ ।

सेतो मच्छिन्द्रनाथलाई विशेषगरी करुणा र सद्भावनाका देवताका रुपमा पूजा गर्ने चलन छ ।

सेतो मच्छिन्द्रनाथ रथयात्रा सुरु हुन लागेको अवसरमा काठमाडौँ महानगरपालिकाका मेयर बालेन शाहले सबैलाई यात्रामा सहाभागी हुन आग्रह गरेका छन्। उनले काठमाडौँ एउटा सहर मात्र नभई सभ्यता रहेको भन्दै मच्छिन्द्रनाथ देवता मात्र नभएर काठमाडौँका एउटा संस्कारको केन्द्रबिन्दु रहेको उल्लेख गरेका छन्।