वैशाख ६, काठमाडौं । राम नवमीको अवसरमा कागेश्वरी मनोहरा नगरपालिका ८ गोठाटारमा रहेको सिताराम मन्दिरको जिर्णोद्वार तथा पुन निर्माण पछि उद्घाटन भएको छ । बुधवार कागेश्वरी मनोहरा नगरपालिकाका नगर प्रमुख उपेन्द्र कार्कीले सिताराम रामेश्वर धामको उद्घाटन गर्नु भयो ।
श्री सीताराम रामेश्वर धाम सञ्चालक समितिका अध्यक्ष मोहन बहादुर महतको सभापतित्वमा भएको कार्यक्रममा नगर प्रमुख कार्कीको प्रमुख आतिथ्यता रहेको थियो ।
धाम उद्घाटन कार्यक्रममा नगर उप प्रमुख शान्ता थापा, वडा नम्बर ८ का वडा अध्यक्ष हरिभक्त पुडासैनीको विशेष आतिथ्यता रहेको थियो । वडा सदस्य सुनिता चापागाई, वडा नं. १ का अध्यक्ष मुकुन्द गजुरेल, विभिन्न पार्टीका प्रतिनिधि, मन्दिर व्यवस्थापन समितिका पदाधिकारी, स्थानीयवासी तथा भक्तजनहरूको महत्वपूर्ण उपस्थिति रहेको थियोे ।
उद्घाटन कार्यक्रमलाई सम्बोधन गर्दै नगर प्रमुख कार्कीले धर्म संस्कृतिको संरक्षणमा समुदाय अगाडि बढ्नु पर्ने धारणा व्यक्त गर्नु हुँदै कागेश्वरी नगरपालिकाले धर्म संस्कृतिको संरक्षणका कार्य गर्दै आएको, संस्कृत शिक्षालाई प्राथमिकताका साथ नगरपालिकामा विद्यालयमा शुरु भएको बताउनु भयो ।
वडा नम्बर ८ का वडा अध्यक्ष हरिभक्त पुडासैनीले वडाका धार्मिक सम्पदाहरुको निर्माण र संरक्षणमा वडाले गर्दै आएका कार्यका बारेमा जानकारी दिनु हुँदै श्री सीताराम रामेश्वर धाम निर्माणका लागि भुमिका खेल्नु भएका सहयोगी व्यक्तित्वहरुलाई धन्यवाद व्यक्त गर्नु भयो । सो अवसरमा मन्दिरको जिर्णोद्वार एवम् पुन निर्माणमा सहयोग गर्नुहुने सहयोगीदाताहरूलाई सम्मान गरिएको थियो ।
सिताराम मन्दिरको जिर्णोद्वार तथा पुन निर्माण कागेश्वरी मनोहरा नगरपालिकाको १२ लाख सहयोग तथा दाताहरुबाट संकलित रकमबाट भएको थियो । मन्दिरको जिर्णोद्वार तथा पुन निर्माणमा ३४ लाख ७६ हजार रकम खर्च भएको समितिका सचिव मुकुन्द प्रसाद गौतमले बौद्ध खबरलाई जानकारी दिनु भयो ।
राम मन्दिर स्थापनाको सुरुवात धननिधि गौतमले गर्नु भएको थियो ।
