फागुन १५, काठमाडौं । एम्बुलेन्समा अवैध रूपमा गाँजा बोक्न थालेपछि पक्राउ पर्नेको सङ्ख्या दिनदिनै सार्वजनिक हुन थालेको छ । सोमवार धनकुटाको भेडेटारमा एम्बुलेन्सभित्र ५२ किलो गाँजा फेला परेको छ । साँगुरीगढीबाट विराटनगरतर्फ जाँदै गरेको मे १ च २०३२ नम्बरको एम्बुलेन्समा गाँजा फेलापरेको हो । एम्बुलेन्समा गाँजा भेटिएपछि प्रहरीले चालक विराटनगर महानगरपालिका ८ का ४८ वर्षीय जयदेव चन्द्र चेललाई पक्राउ गरेको जनाएको छ । ५२ वटा प्लास्टिकको प्याकेटमा गाँजा राखेर लैजाँदै गरेको अवस्थामा एम्बुलेन्सभित्र गाँजा फेला परेको इलाका प्रहरी कार्यालय भेडेटारका प्रमुख जीवन कार्कीले जानकारी दिनुभयो। झापास्थित हल्दिबारी सेवा समाजको नाममा रहेको उक्त एम्बुलेन्स नोबेल अस्पताल विराटनगरदेखि साँगुरीगढी गाउँपालिका ३ मा बिरामी लिएर आएको अनुसन्धानको क्रममा रहेको प्रहरीले जनाएको छ । पछिल्लो वर्षदेखि एम्बुलेन्सको दुरुपयोग बढ्दोक्रम देखिएको छ । एम्बुलेन्स बिरामी बोक्ने नभएर गाँजा बोक्ने भएको छ । एम्बुलेन्समा नियमअनुसार अक्सिजनको व्यवस्था गर्नुपर्ने, दमको औषधि दिने यन्त्र राख्नुपर्ने, पानी चढाउने व्यवस्था हुनुपर्ने र स्ट्रेचर राख्नुपर्ने हुन्छ । तर यहाँ सञ्चालित एम्बुलेन्समा यो सबै व्यवस्था छैन । स्वास्थ्य मन्त्रालयले बनाएको नियम खुकुलो नभएको भए एम्बुलेन्सको दुरुपयोग बढ्ने थिएन । प्रहरीले विना चेकजाँच एम्बुलेन्सको लागि बाटो खुला गर्ने गरेको थियो । बिरामी बोक्ने एम्बुलेन्सको सडकमा चेकजाँच कम हुने भएकोले एम्बुलेन्सबाट गाँजा तस्करी गर्नेको संख्या बढेको हो । गत असोज यता सुनसरीबाट मात्रै प्रहरीले १६ सय ९८ किलो ३४६ ग्राम गाँजा  र ओसारपसारमा संलग्न  ६० जनालाई पक्राउ गरेको थियो ।