चैत्र २, काठमाडौं । बिहीवार साँझ बौद्धमा सम्पन्न भएको स्वर्गीय बाबुछिरी शेर्पा खुला क्लाइम्बिङ प्रतियोगिताको उपाधि सिर्जना तामाङ र तेन्जिङ राईले हात पारेका छन् । महिलातर्फ सिर्जना तामाङ र पुरुषतर्फको तेन्जिङ राईले उपाधि जितेको हो । विजेता दुवै जनाले नगद ५० हजार पुरस्कारसहित पदक र प्रमाणपत्र प्राप्त गरेका छन्। प्रतियोगितामा पुरुष २६ र महिला १५ जना गरी ४१ जना प्रतिस्पर्धी सहभागी थिए । पुरुषतर्फ रोनक उप्रेती दोस्रो र साजन लामा तेस्रो भए। यसै गरी महिलातर्फ स्वस्तिका चौधरी र प्रेरणा राई क्रमशः दोस्रो र तेस्रो भए । पर्वतीय खेलकुद सङ्घका अध्यक्ष ङावाङ निमा शेर्पाका अनुसार विजेताले क्रमशः ३० हजार र तेस्रो हुनेले १५ हजार रुपैयाँ पुरस्कार वितरण गरिएको छ । विश्व कीर्तिमानी आरोही बाबुछिरी शेर्पाको योगदानको सम्झनामा आयोजना गरिएको प्रतियोगिता पर्वतीय खेलकुद सङ्घ र सगरमाथा आरोही सङ्घको संयुक्त आयोजनामा सम्पन्न भएको थियो । १० औँ पटक सगरमाथा शिखर चुमेका स्वर्गीय बाबुछिरी शेर्पालाई सम्झिँदै साहसिक खेलको क्षेत्रबाट पर्यटन प्रवर्द्धनमा टेवा पुर्‍याउने उद्देश्यले आयोजना गरिएको प्रतियोगितालाई प्रत्येक वर्ष निरन्तर गर्ने उनको भनाइ छ ।