उत्तरपुस्तिका हराउनेमाथि कारवाही गर्न अनेरास्ववियुको माग
चैत्र १५, काठमाडौं । अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले उत्तरपुस्तिका हराउनेमाथि कारवाही गर्न माग गरेको छ । त्रिभुवन विश्वविद्यालय परीक्षा नियन्त्रण कार्यालयबाट विद्यार्थीका उत्तरपुस्तिका हराएपछि अनेरास्ववियु त्रिवि जिल्ला कमिटीले कारवाही गर्न माग गरेको हो ।
एकातिर परीक्षा सञ्चालन भएको एक वर्षसम्म पनि नतिजा सार्वजनिक गर्न नसक्नु र अर्कोतिर परीक्षार्थीले दिएका उत्तरपुस्तिका हरायो भन्नु परीक्षा नियन्त्रण कार्यालयको गम्भीर लापरवाही रहेको अनेरास्ववियुले दाबी गरेको छ ।
त्रिवि जिल्ला अध्यक्ष समिरराज विष्टले एक विज्ञप्ति जारी गर्दै तत्काल छानबिन गरी दोषीलाई कारवाही गर्न माग गरेका छन्।
परीक्षा नियन्त्रण कार्यालयबाट पटक–पटक भइरहेको चरम लापरबाही, परीक्षा समितिको अध्यक्ष (रजिष्ट्रार) तथा परीक्षा नियन्त्रक एवम् कार्यरत कर्मचारीहरूको गैरजिम्मेवारीपना, उदासीनता र ढिलासुस्ती गर्ने प्रवृत्तिप्रति तत्काल छानबिन गरी दोषीलाई कारवाहीको दायरामा ल्याउन समेत अनेरास्ववियु त्रिवि जिल्ला कमिटी आग्रह गर्दछ अन्यथा उक्त गतिविधिमा सङ्लग्न सबैलाई अनेरास्ववियु आफैले कारवाही गर्ने चेतावनी दिएको विज्ञप्तिमा उल्लेख छ ।