आज साउने सोमबारः पशुपतिमा दर्शनाथीको भीड तस्वीरमा
साउन १, काठमाडौँ । आज साउन १ गते अर्थात् पहिलो सोमबार शिवजीसँग जोडिएको महिना हो । साउन महिनामा शिवको पूजा गरे सबै देवताको पूजा गरे बराबर फल प्राप्त हुन्छ भन्ने सनातन विश्वास छ ।
आज विहानदेखि पशुपतिनाथ मन्दिरमा शिवको दर्शन एवम् जल चढाउनका लागि विभिन्न स्थानबाट महिला दर्शनाथीहरू आउने गरेका छन् । त्यस्तै साउन महिनालाई नेपाली महिलाहरूको विशेष पर्वको रूपमा हेर्ने गरिन्छ । साउन महिना धार्मिक, प्राकृतिक एवं सांस्कृतिक दृष्टिकोणले महत्त्वपूर्ण भएकाले यो महिनालाई विशेष रूपमा लिइन्छ । विशेष गरी साउनको सोमबार शिवजीको व्रत एवं पूजा गर्ने चलन छ । पार्वतीले साउन महिनाभरि निराहर रही कठोर व्रत बसेर भगवान शिवलाई प्राप्त गरेको किम्वदन्ती सुनेका हुनाले महिलाहरूले यसलाई बढी महत्त्व दिन्छन् ।
साउनको महिना व्रत बसी शिवको पूजा गरे आफू, श्रीमान, सन्तान एवं परिवार सबैको कल्याण हुने धार्मिक विश्वास छ । महिनाको अरू दिन नसके पनि सोमबार व्रत बसी शिवलाई शुद्ध जल चढाएर खुसी बनाउन सकिन्छ भन्ने शास्त्रीय मान्यता छ । विशेषतः महिलाहरू आफ्ना जीवनसाथी वा भविश्यमा राम्रो वर प्राप्त होस भन्ने मनोकांक्ष राखी हरेक सोमबार व्रत बस्ने प्रचलन रहिआएको छ ।
साउने सोमबारका दिन भगवान् शिवको विशेष पूजाआराधना गर्ने परम्परा छ। ज्योतिषशास्त्रअनुसार सोमवारको स्वामी भगवान् शिव भएकाले यो दिनको शिवोपासना विशेष मानिन्छ। अझ यो महिनाको सोमवार गरिने शिवको व्रत पूजा विशेष फलदायी हुने मान्यता छ । यस दिन आफू र आफ्नो परिवारको सुस्वास्थ्य, दीर्घायु एव विभिन्न कामना गर्दै व्रत बस्ने परम्परा छ। हस्ता नक्षत्रयुक्त सोमवारको व्रतको प्रभावले पार्वतीले महादेव स्वामी पाएको प्रसंग पुराणमा पाइन्छ।
तस्वीरः युरेशन याङ्या सुब्बा