फागुन २४, काठमाडौं । काठमाडौंमा प्रहरीले कुनै पनि घटना हुनेवित्तिकै परिचालन हुने ‘क्वीक रेस्पोन्स टिम (ई–क्यूआरटी)’ सेवा सुरु गरेको छ । अपराध अनुसन्धान र नियन्त्रणका लागि प्रविधिको प्रयोगलाई बढाउँदै लैजाने नीति अनुरुप ‘क्वीक रेस्पोन्स टिम (क्यूआरटी)’ सेवालाई प्रहरीले डिजिटल बनाएको हो । जिल्ला प्रहरी परिसर, काठमाडौंका प्रमुख एसएसपी भुपेन्द्र खत्रीका अनुसार, अब प्रहरीको क्यूआरटी टोली घटनास्थलमा पुगे/नपुगेकोसहित उनीहरुको सम्पूर्ण गतिविधि अफिसरहरुले जहाँसुकैबाट निगरानी गर्न सकिन्छ। ‘घटनास्थलको लाइभ तस्वीर र भिडियो पनि सिस्टममा प्राप्त हुने एसएसपी खत्रीले जानकारी दिए । यसले अपराध अनुसन्धानलाई प्रभावकारी बनाउने विश्वास छ भन्दै समस्यामा परेका नागरिकसम्म पुग्ने समयलाई घटाउन समेत मद्दत पुग्नेछ एसएसपी खत्रीले भने । एसएसपी खत्रीका अनुसार, काठमाडौं प्रहरी मातहतका वृत्त र प्रभागहरुबाट जीपीएस (ग्लोबल पोजिसनिङ सिस्टम) मार्फत मोटरसाइकलमा खटिने टोलीको लोकेसन नियमित ट्र्याक हुनेछ । ‘घटना भएको स्थानमा यथाशीघ्र पुग्ने वातावरण निर्माण गर्न २४ सै घन्टा प्रहरी कन्ट्रोल रुमबाट ट्र्याकिङ गर्न मिल्ने गरी डिजिटल प्रणाली जडान भएको छ’, उनले भने, ‘घटनास्थलमा पुग्नासाथ प्रहरीको काम कारवाही र सेवाग्राहीसँगको व्यवहार समेत स्वतः रेकर्ड हुनेछ । कन्ट्रोल रुमबाट सम्बन्धित कमाण्डरले पनि लाइभ हेर्न सक्नेछन् ।’ राजधानीमा खटिने ६० वटा पुलिस क्यूआरटी टोलीको सदस्यलाई शरीरमा हुने क्यामरासहितको प्रविधि जडान गरिएको हुन्छ । जिल्ला प्रहरी परिसर, टेकुमा बुधवार आयोजित कार्यक्रमका बीच ई–क्यूआरटी सेवा उपत्यका प्रहरी प्रमुख एआईजी दीपक थापाले उद्घाटन गरेका थिए । प्रहरी समयमा नपुगेको गुनासोलाई अझै कम गर्दै लैजाने नीति अनुरुप यो सेवा सुरु गरेको एआईजी दीपक थापाले जानकारी दिएका थिए । उनले यो सेवालाई क्रमशः भक्तपुर र ललितपुरमा पनि विस्तार गरिने बताए । कार्यक्रममा क्यूआरटी टोलीका सदस्यलाई काठमाडौंका प्रमुख जिल्ला अधिकारी जितेन्द्र बस्नेतले, एआईजी थापा, जिल्ला सरकारी वकिलको कार्यालय, काठमाडौंका सहन्यायाधीवक्ता सन्देश श्रेष्ठ लगायतले जीपीएस ट्र्याकिङ डिभाइस, शरीरमा लगाउन मिल्ने क्यामरा, हेलमेट, नि–गार्ड, रेडियो सेट, साइरन लगायतका सामग्री हस्तान्तरण गरेका थिए ।