म्यानमारको उपहार बुद्धको मूर्ति नेपाल ल्याउन सकस
१८ भाद्र, काठमाडौं । म्यानमारका केही बौद्ध संघसंस्थाहले दुई वर्ष अघि संयुक्त रूपमा नेपाल सरकारलाई हस्तान्तरण गर्ने भनिएको करिब ३२ टन बराबरको बुद्धको मूर्ति नेपाल ल्याउन झन्डै १४ करोड रुपैयाँ भाडा लाग्ने भएपछि सरकारलाई सकस भएको छ । तत्कालीन प्रधानमन्त्री शेरबहादुर देउवाको पालामा धेरै महँगो धातु ह्वाइट जेड स्टोनबाट बनेको बुद्धको मूर्ति, म्यानमारको बुद्धिस्ट एसोसिएसन, च्याम्बर अफ कमर्स र भिक्षुहरू लगायतले संयुक्त रूपमा लुम्बिनी गार्डेन फाउण्डेशनलाई उपहारस्वरूप दिएको हो । सोही मूर्ति फाउण्डेशनले नेपाल सरकारलाई हस्तान्तरण गर्ने निर्णय गरेको थियो ।
तत्कालीन प्रधानमन्त्री शेरबहादुर देउवा, वर्तमान प्रधानमन्त्री पुष्पकमल दाहाल ‘प्रचण्ड’सँगै प्रतिपक्षी दलका प्रमुख नेताहरूलाई भेटेर फाउन्डेसनका अधिकारीले बुद्धको मूर्ति म्यानमारले उपहारस्वरूप दिन खोजेको जानकारी गराएका थिए ।
प्रधानमन्त्री कार्यालयले गत सातामात्रै पर्यटन मन्त्रालयमा फाइल पठाएर मूर्ति ल्याउने गरी प्रस्ताव पेश गर्न निर्देशन दिएको छ । यसबारे संस्कृति, पर्यटन तथा नागरिक उड्डयन मन्त्रालयमा छलफल चलिरहेको छ । करिब ३२ टनको बुद्धको बहुमूल्य मूर्ति नेपाल ल्याउन सके पर्यटकीय प्रवर्द्धनमा थप टेवा पुग्ने विश्वास छ । पर्यटनमन्त्री सुदन किराँतीकाअनुसार म्यानमारबाट कसरी बुद्धको मूर्ति ल्याउन सकिन्छ भनेर अध्ययन भइरहेको र बुद्धको मूर्ति नेपाल ल्याउन पाए धेरै राम्रो हुन्थ्यो ।
उता, मन्त्रालयका एक उच्च अधिकारीले एउटा निजी संस्थाले सरकारलाई दिन लागेको उपहार कसरी ग्रहण गर्ने, यस सम्बन्धमा स्वामित्व नेपाल सरकारमा रहने गरी काम थालिरहेको बताए । उनले भने,‘भाडा पनि करोडौँ लाग्ने देखियो । सार्वजनिक खरिद ऐनअनुसारै भाडामा बिडिङ गरेर जाने तयारीमा छौं ।’
फाउन्डेसनका महासचिव एकराज गिरीका अनुसार प्रधानमन्त्रीदेखि मन्त्रीहरूसम्म सकारात्मक रहेकाले निकट भविष्यमै मूर्ति नेपालमा ल्याउने तयारी भइरहेको छ । उनका अनुसार वर्तमान, निवर्तमान र पूर्व प्रधानमन्त्रीसमक्ष यसबारे जानकारी गराइसकेको र उहाँहरू सकारात्मक नै हुनुहुन्छ, मुख्य कुरा मन्त्रालयहरूमा फाइल अड्काउने कामले ढिला भएको हो ।
सुरुमा तीनकुनेमा राख्ने भनिएको बुद्धको मूर्ति अहिले गोकर्णेश्वर र बुढानीलकण्ठ नगरपालिकाको सीमामा पर्ने थानडाँडामा राख्ने बताइएको छ । तीनकुनेमा स्थानीयको जग्गा मुआब्जा विवाद देखिएपछि ठाउँ फेरिएको थियो ।
फाउन्डेसनका महासचिव गिरीले पछिल्लो पटक म्यानमारका बुद्धिस्ट एसोसिएसनले मूर्ति लैजाने वा नलैजाने भन्ने सम्बन्धमा छिटो निर्णय लिन भनेको छ । उनले भने, ‘हामीले राम्रै उद्देश्य राखेर बुद्धको मूर्ति ल्याउने पहल थाल्यौँ तर सरकारले गाम्भीर्य बुझेन ।’