मुम्बईमा ठुलो होर्डिङ बोर्ड भत्किँदा आठ जनाको मृत्यु, ६० जना घाइते
जेठ १, काठमाडौं । भारतको मुम्बईमा मुम्बईमा सोमवार आएको आँधी र वर्षाका कारणले ठुलो होर्डिङ बोर्ड भत्किँदा भएको दुर्घटनामा परी मृत्यु हुनेको सङ्ख्या आठ पुगेको छ । प्रहरीका अनुसार घाटकोपर (इ) क्षेत्रको समता कोलोनीमा रहेको रेलवे पेट्रोल पम्प नजिकै राखिएको होर्डिङ बोर्ड बेलुका ४ः३० बजे एक्कासि आएको आँधीले खसेको हो ।
दुर्घटनामा करिब ६० जना घाइते भएका छन् ।
होर्डिङ बोर्ड ७०x५० मिटर ठुलो थियो ।
अधिकारीहरूका अनुसार यो होर्डिङ खसेको पेट्रोल पम्पमा पानी र हावाहुरीका कारण ठुलो सङ्ख्यामा मानिसहरू ओत लागेर बसिरहेका थिए ।
दुर्घटनाका एक प्रत्यक्षदर्शीले भने, “धेरै पानी परिरहेकाले हामीले कार साइडमा पार्क गर्यौँ। हामी केही बेर बसेका मात्र थियौँ, त्यही बेला एक्कासि बोर्ड खस्न पुग्यो । त्यसमामा दुई पाङ्ग्रे र चारपाङ्ग्रे सवारी साधनसहित धेरै जना च्यापिए ।”
समाचार एजेन्सी एएनआईका अनुसार राज्यका मुख्यमन्त्री एकनाथ शिन्देले दुर्घटनास्थलको निरीक्षण गरेपछि दुर्घटनामा घाइते भएका बिरामीलाई भेट्न अस्पताल पुगेका थिए । उनले मुम्बईका सबै होर्डिङको विशेष संरचनात्मक लेखा परीक्षण गरिने बताए । शिन्देले भने, ‘दुर्घटनाका लागि जिम्मेवार व्यक्तिमाथि कर्तव्य ज्यान मुद्दा चलाइनेछ ।’ उनले मृतकका परिवारलाई तत्काल ५ लाख रुपैयाँ क्षतिपूर्ति दिने घोषणा समेत गरेका छन् ।