वैशाख २४, काठमाडौं । बागमती प्रदेशमा आजदेखि तामाङ र नेपाल भाषा (नेवारी) पनि सरकारी कामकाजको भाषाका रुपमा लागू भएका छन् ।  प्रदेश सरकारले नेपाली भाषासहित तामाङ र नेपाल भाषालाई पनि सरकारी कामकाजको भाषाका रुपमा प्रयोग गर्ने निर्णय गरेको हो । 

आज सोमवार काठमाडौंको वसन्तपुरमा आयोजित कार्यक्रममा बागमती प्रदेशले सरकारी कामकाज भाषा ऐन, २०८० को शुभारम्भ प्रधानमन्त्री पुष्पकमल दाहालले गरे ।  

मुख्यमन्त्री शालिकराम जम्कट्टेलले प्रदेशमा तामाङ र नेवारी समुदायको बाहुल्य बसोबास रहेकाले ती समुदायको भाषालाई सरकारको कामकाजको भाषाकोरुपमा प्रयोग गर्नु उपयुक्त देखिएको बताए । 

प्रदेश मन्त्रिपरिषद्को वैशाख १२ गतेको निर्णयबमोजिम नेपाली भाषाको अतिरिक्त तामाङ भाषा र नेपाल भाषालाई पनि बागमती प्रदेशमा सरकारी कामकाजको भाषाको रूपमा लागू हुने दिनमा सार्वजनिक बिदा दिने निर्णय गरेको थियो । सोमवार काठमाडौँ महानगरपालिकाले पनि महानगर मातहतका सबै विद्यालयहरूमा सार्वजनिक बिदा दिइएको छ । 

समारोहको शुभारम्भ गर्नुअघि विभिन्न बाजागाजासहित र्‍याली निकालिएको थियो। 

काठमाडौंको वसन्तपुरमा आयोजित कार्यक्रममा बागमतीका मुख्यमन्त्री शालिकराम जमकट्टेल, संस्कृति पर्यटन र सहकारीमन्त्री शैलेन्द्रमान बज्राचार्य, काठमाडौँ महानगरपालिकाकी उपप्रमुख सुनिता डंगोल लगायतको उपस्थिति थियो।

बागमती प्रदेश सरकारी कामकाजी भाषा ऐन शुभारम्भ घोषणा कार्यक्रमका तस्बिर