गैरआवासीय नागरिकता वितरण राष्ट्रघाती कार्यको सुरूवात : प्रभु साह
३० असोज, काठमाडौं । आम जनता पार्टीका अध्यक्ष प्रभु साहले गैरआवासीय नागरिकता वितरण कार्यलाई राष्ट्रघाती कार्यको सुरूवात भएको बताएका छन् । सरकारले मंगलबार आज विहान प्रधानमन्त्री पुष्पकमल दाहाल प्रचण्डले नै बालुवाटारमा कार्यक्रम आयोजना गरी गैरआवासीय नागरिकता एन.आर.एन.ए. अन्तर्राष्ट्रिय समन्वय परिषद्का अध्यक्ष कुल आचार्य र बद्री केसीलाई प्रदान गरी वितरण कार्य सुरू गरेका थिए ।
तर, सरकारको यो कदम देशको पक्षमा नरहेको भन्दै साहले विरोध गरेका हुन् ।
‘गैरआवासीय नागरिकता वितरण राष्ट्रघाती कार्यको शुरूवात हो । विदेशी नागरिकलाई नेपाली नागरिकता दिने कार्य खुलेआम राष्ट्रघाती कार्य हो’ साहले सामाजिक सञ्जालमा लेखेका छन् । साथै थप स्पष्टीकरण गर्दै साह लेख्छन्– ‘खर्बौं खर्बको चल सम्पति अवैध ढंगले विदेश पुर्याइसकेका तिनिहरूले अब आफनो अचल सम्पत्ति पनि खुलेआम विदेश लान पाउनेछन’ , ‘नेपालमा लुटेर राखेका सम्पति समेत विदेश लैजानलाई अब कानुनी समस्या हुने छैन ।’ उनका अनुसार गैरआवासीय नागरिकता वितरणले बिदेशी नागरिकता लिएका नेपालीहरुको नेपालमा रोकिएको अचल सम्पत्ति बेचबिखन गरि विदेश लैजानको लागि बाटो खुल्नेछ ।
‘विदेशी लगानी नेपाल ल्याउनलाई यो दोहोरो नागरिकताको प्रावधान ल्याइएको भन्ने हल्ला मचाएर आज ठुलो राष्ट्रघाती कार्य हुदैँछ । यस अपराधजन्य कार्यको विरुद्ध एक भएर प्रतिवाद गरौँ । राष्ट्रघाती कार्य मुर्दावाद, प्रतिक्रान्तिकारीहरु होशियार ।’ साहले लेखेका छन् ।