१५ कार्तिक, काठमाडौं । सरकारी कर्यालयहरूले नै विद्युत् महसुल  समयमै नतिरेपछि विद्युत प्राधिकरणले सरकारी कार्यालयहरूमा लाइन काट्न थालेको छ । बुधबार पोखरास्थिति गण्डकी प्रदेशका मन्त्रालयहरू भौतिक पूर्वाधार मन्त्रालय र उद्योग, पर्यटन, वन तथा वातावरण मन्त्रालयको समेत लाइन काटिएको छ । प्राधिकरणका अनुसार मन्त्रालयहरूले करिब १ लाख ५३ हजार रुपैयाँ महशुल तिर्न बाँकी थियो । पोखरास्थित प्रादेशिक कृषि निर्देशनालयले २३ हजार ३४१ रुपैयाँ महसुल तिर्न बाँकी रहेकोले प्राधिकरणले लाइन काटिएको छ । त्यस्तै भूमि व्यवस्थापन एसीएमको ६२ हजार २३५ रुपैयाँ महसुल नतिरेको हुनाले लाइन काटिएको छ । ५० हजार ९१३ रुपैयाँ महसुल नतिरेको प्रादेशिक पशुरोग निदान विभाग, ७६ हजार ६८९ रुपैयाँ महशुल नतिरेको फेवाताल जलाधार आयोजना, १७ हजार ८६९ रुपैयाँ महसुल नतिरेको विजयपुर बेगनास ताल सिँचाइ कार्यालय र करिब ५६ हजार बक्यौता रहेको प्रादेशिक शिक्षा निर्देशनालयको पनि लाइन काटिएको छ । मंगलबार काठमाडौंको केन्द्रीय कारागारको लाइन काट्दा रातिको समयमा कैदी भाग्न सक्ने भन्दै छिट्टै भुक्तानी गर्ने प्रतिबद्धता जनाएर लाइन जोड्न आग्रह गरेपछि प्राधिकारले पछि लाइन जोडिदिएको थियो । कारागारले १ करोड ४६ लाख ६७ हजार रुपैयाँ तिर्न बाँकी छ । नेपाल विद्युत् प्राधिकरणका वितरण विभाग प्रमुख मनोज सिलवालका अनुसार महसुल नतिर्नेहरुको लाइन काट्ने क्रम तीव्र पारिनुको साथै विनियमअनुसार महसुल समयमै नतिर्ने र ठूलो बक्यौता रहेका सरकारी कार्यालयमा समेत लाइन काट्ने क्रम तीव्र  छ ।