पुष १३, काठमाडौं । ललितपुरको बालकुमारीमा भएको आन्दोलनलाई नियन्त्रण लिनका लागि प्रहरीले चलाएको गोली लागेर घाइते भएका आन्दोलनकारी २३ वर्षीय युवाको मृत्यु भएको छ। किष्ट अस्पतालका अनुसार दैलेखका २३ वर्षीय सुजन राउतको उपचारका क्रममा निधन भएको हो । घाइतेलाई १२ बजेर ४० मिनेटमा किष्टमा ल्याइएको र उनलाई चिकित्सकहरूले दिउँसो १ बजेर १७ मिनेटमा मृत घोषणा गरेका हुन् । प्रदर्शनमा सहभागी अर्को एक जना घाइतेको अवस्था गम्भीर छ । किष्ट अस्पतालका चिफ अपरेटिङ अफिसर अमिस पाठकले भने– “मृतक पुरुष  २३ वर्षका रहेका छन् । छातीमा रातो डाम देखिएको छ’, ‘अस्पतालमा ल्याइपुर्‍याउनेको भनाइ अनुसार झडपमै परेको भन्ने छ ।’ आन्दोलनकारीहरूले नै उनलाई बोकेर अस्पताल ल्याएका थिए । उनलाई शुक्रवार दिउँसो बालकुमारीमा भएको आन्दोलनमा प्रहरीले चलाएको गोली लागेको बताइएको छ । रोजगार अनुमति प्रणाली (ईपीएस) मार्फत कोरियामा काम गर्न जान खोज्नेहरूले गरेको प्रदर्शन नियन्त्रणमा लिन प्रहरीले गोली चलाएको हो । स्थिति नियन्त्रणमा लिन गोली चलाउनु परेको जिल्ला प्रहरी परिसर ललितपुरका एकजना अधिकृतले  जानकारी दिए । प्रदर्शन नियन्त्रणमा लिन प्रहरीले अश्रुग्यास पनि प्रहार गरेको थियो ।  यस्तै आगजनीमा संलग्न १० जनालाई प्रहरीले पक्राउ समेत गरेको छ । https://www.samwadkhabar.com/archives/18627