माघ १६, काठमाडौं । काठमाडौं, चाबहिलको चुच्चेपाटीमा अवस्थित मनास्लु वर्ल्ड कलेज र गोकर्णेश्वर नगरपालिका बिच द्वीपक्षीय सम्झौतामा हस्ताक्षर भएको छ। मनास्लु कलेज र नगरपालिकाको सहकार्यमा यस नगरपालिकाको जेहेन्दार विपन्न वर्गका अधिकतम पाँच जना विद्यार्थीहरूलाई छात्रवृत्ति दिनुको साथै शैक्षिक परामर्शका कार्यक्रम गरिने विषयमा द्वीपक्षीय सम्झौता भएको हो । सम्झौता अनुसार  गोकर्णेश्वर नगरपालिकाको सिफारिसमा जेहेन्दार, बिपन्न तथा लक्षित वर्गका अधिकतम पाँच जना विद्यार्थीहरूलाई छात्रवृत्ति सहुलियतमा मनास्लु वर्ल्ड कलेजमा अध्ययनको अवसर प्रदान गरीने छ । ५ जनाको कोटा पुगेपछि नगरपालिकाको सिफारिसमा अरू विद्यार्थीहरूलाई २० प्रतिशत छुट प्रदान गरिने छ । गोकर्णेश्वर नगरपालिकाभित्रको शैक्षिक विकासका क्षेत्रमा मनास्लु वर्ल्ड कलेजको सहभागीता रहने, नगरपालिकाभित्र संचालन हुने शैक्षिक विकासका कार्यक्रमहरूमा आवश्यकता अनुसार सहकार्य र सहजीकरण गर्ने, नगरपालिकामा संचालित विधालयमा शैक्षिक गुणस्तर अभिवृद्धि र अनुकुल शिक्षण सिकाई वातावरण निर्माणका लागि शिक्षक तालिम र बिद्यार्थी परामर्श जस्ता कार्यक्रम संचालन गर्न सहयोग गर्ने छ । गोकर्णेश्वर नगरपालिकाको तर्फबाट नगर प्रमुख दिपक कुमार रिसाल र मनास्लु वर्ल्ड कलेजका तर्फबाट अध्यक्ष गेन्द्र लामा र कलेजका प्रिन्सिपल राजन श्रेष्ठले सम्झौता पत्रमा हस्ताक्षर गर्नुभएको छ । द्वीपक्षीय सम्झौता हस्ताक्षर कार्यक्रममा प्रमुख प्रशासकीय अधिकृत टेकराज पन्थी, वडा नं ९ का वडा अध्यक्ष राजिव थापा, वडा सदस्यहरूलगायतको उपस्थिति रहेको थियो।