आजबाट त्रिकोणात्मक टी-२० श्रृंखला सुरु, पहिलो खेल नेपाल र नामिबिया प्रतिस्पर्धा गर्दै
फागुन १५, काठमाडौं । नेपाल, नामिबिया र नेदरल्यान्ड्स सम्मिलित टी–२० श्रृंखला मंगलवारबाट सुरु हुँदै छ। पहिलो खेलमा नेपाल र नामिबिया प्रतिस्पर्धा गर्दैछन्। खेल त्रिवि क्रिकेट मैदान, कीर्तिपुरमा आज बिहान ११ः३० मा सुरु हुने छ।
आइसिसी क्रिकेट विश्वकप लिग२ को समापनपछि टी–२० विश्वकपको तयारीस्वरूप यो सिरिज हुन लागेको हो। आगामी जुनमा हुने टी-२० विश्वकपको तयारीका लागि नेपाले विभिन्न अन्तर्राष्ट्रिय सिरिजको तयारी गरिरहेको छ।
भर्खरै सम्पन्न भएको विश्वकप लिग– २ अन्तर्गतको घरेलु सिरिजमा नेपालले ४ खेलमा एक मात्र जित हासिल गर्न सफल भयो। नामिबियाले भने ४ खेलमध्ये तीन खेलमा जित निकालेर शीर्ष स्थानमा रह्यो।
नेपालले विश्वकप लिग–२ खेलेको टोलीमा केही परिवर्तन गर्दै यस सिरिजका लागि १८ सदस्यीय टोली घोषणा गरिसकेको छ।
नेपाली टिमः रोहित पौडेल (कप्तान) आसिफ शेख, अनिल शाह, कुशल भुर्तेल, कुशल मल्ल, आरिफ शेख, दीपेन्द्रसिंह ऐरी, गुलशन झा, सोमपाल कामी, करण केसी, ललित राजवंशी, प्रतिश जिसी, सन्दीप जोरा, विनोद भण्डारी, विवेक यादव, राशीद खान, सागर ढकाल र अभिनाश बोहोरा
नामिबियाको टिमः जेरार्ड एरास्मस (कप्तान), जेन ग्रिन (विकेटकिपर), जेजे स्मिट (उपकप्तान), माइकल भान लिंगेन, निकोल लोफ्टि–इटन, सन फौसी, बेन शिकोंगो, जान फ्रिलिंक, रुबेन ट्रम्पलम्यान, निको डाभीन, टांगेनी लुंगामेनी, ज्याक ब्रेसल, बर्नार्ड स्कोल्ज, जेपी कोट्जे र मलान क्रुगर