निजगढ वर्कसप विस्फोट : थप दुईको मृत्यु
फागुन १५, काठमाडौं । निजगढ नगरपालिका–७ मा सोमबार शङ्कास्पद वस्तु विस्फोट हुँदा थप दुई जनाको मृत्यु भएको छ । योसँग गरेर मृत्यु हुनेको संख्या तीन पुगेको छ । घटनामा गम्भीर घाइते भएकामध्ये वीरगञ्जमहानगरपालिका–९ बस्ने २० वर्षीय रितु रजत र भारतको मोतिहारी जिल्ला ढाका थाना गवाई गाँव बस्ने ३५ वर्षीय राकेश जयसवाल रहेको छ ।
वीरगञ्जस्थित नेपाल मेडिसिटी व्योधा अस्पतालमा उपचारको क्रममा रजतको सोमवार राति पौने १० बजे र जयसवालको मङ्गलवार बिहान ७ः३० बजे मृत्यु भयो ।
जिल्ला प्रहरी कार्यालय बाराका प्रहरी उपरीक्षक सुरेशप्रसाद काफ्लेका अनुसार निजगढ नगरपालिका–७ मा रहेका रोहित वर्कसप लेथका सञ्चालक सोही ठाउँ–५ का ४५ वर्षीय रेशम मगरको अस्पतालमा उपचारको क्रममा सोमवार दिउँसो मृत्यु भएको थियो ।
तीन जना घाइतेको उपचार भइरहेको छ । निजगढका सूर्यबहादुर थापाको सामुदायिक प्रसूति गृह अस्पतालमा उपचार भइरहेको छ भने वीरगञ्जका फिरोद देवान र भारतका अरविन साहको बयोधामा उपचार भइरहेको छ ।
सो घटनामा प्रहरीले दुई जना रमेश जैसवाल र निजगढका टिकाराम पाख्रिनलाई पक्राउ गरेको छ । सोमवार दिउँसो १२ बजे (हाई एक्सफ्लोसिप) शङ्कास्पद बस्तु ग्यासले काट्ने क्रममा विस्फोट हुँदा भएको घटनाको अनुसन्धानका क्रममा कवाडी खरिद गर्ने भारत मोतिहारी जिल्ला बस्ने अन्दाजी ४० वर्षीय राज भनिने रमेश जैसवाल र कवाडी बिक्री गर्ने निजगढ नगरपालिका–९ बस्ने २९ वर्षीय टिकाराम पाख्रिङलाई पक्राउ गरिएको हो ।