फागुन २८, काठमाडौं । अमेरिकाको मेरिल्यान्डस्थित पशुपति बुद्ध मन्दिर जर्मनटाउन सहरमा मार्च ८ शुक्रवार महाशिवरात्रिको पावन अवसरमा १० फिट उचाइ भएको शिवको विशाल प्रतिमाको स्थापना गर्दै प्राण–प्रतिष्ठा भव्यताको साथ सम्पन्न गरिएको छ । बसाहा, त्रिशूलसहितको स्थापित शिवको मूर्तिलाई श्री पशुपति बुद्ध मन्दिरमा १२ बजे पछि रुद्री अभिषेक गरी प्राण प्रतिष्ठा सम्पन्न गरिएको हो । नेपाली समुदायद्वारा अमेरिकाको विभिन्न राज्य र सहरहरूमा स्थापना गरिएका मन्दिरहरूमा स्थापना गरिएका देवी देवताका प्रतिमाहरूमध्ये यो सबैभन्दा ठुलो प्रतिमा भएको बताइएको छ । सन् २०१७ मा ठुलो बुद्धको मूर्ति यही मन्दिरको अर्को स्थान वेल्सभिलमा स्थापना गरिएको थियो भने हाल उक्त मूर्ति पनि जर्मनटाउन मै सारिएको छ । यो विशाल मूर्ति दीपक श्रेष्ठ ,सुनिल श्रेष्ठ , नानी मैया श्रेष्ठ तथा उनीहरूकै सबै सम्पूर्ण परिवारहरूले पशुपति बुद्ध मन्दिरलाई प्रदान गरेका छन् । साथै महाशिवरात्रिको कार्यक्रम अन्तर्गत ५ देखि ६ः३० सम्म सङ्कल्प पूजा र ६ बजे शिव धुनी गरिएको थियो । मन्दिरका पण्डित गोविन्द अधिकारीले सबै पूजा अर्चना, प्राण प्रतिष्ठा ,रुद्री अभिषेक र सङ्कल्प पूजा गराएका थिए । दिउँसोदेखि मन्दिरमा घुइँचो लागेको थियो भने १२ बजे देखि राती सम्म करिब १ हजार मानिसहरूले शिवको प्रतिमा दर्शन गर्नुका साथै शिवधुनीमा सहभागिता जनाएका थिए । नेपाल शिक्षा तथा सांस्कृतिक केन्द्र (एनईसीसी)का अध्यक्ष डा. प्रज्ज्वल रेग्मीले शिव मूर्तिका दाता लगायत सम्पूर्ण समुदायलाई मन्दिरको उन्नति र प्रगतिमा साथ सहयोग गर्नु हुने नेपाली समुदायलाई विशेष रूपमा हार्दिक धन्यवाद सहित आभार व्यक्त गरेका छन् ।