अमेरिकाको मुक्तिनाथ धाममा हिमानीद्वारा रुद्राभिषेक गरिने
चैत्र १३, काठमाडौं । अमेरिकाको नर्दन क्यालिफोर्नियामा हालै स्थापना गरिएको पहिलो मुक्तिनाथ धाममा यही चैत्र १८ गते पूर्वयुवरानी हिमानी शाहले हिन्दु तथा बौद्ध धर्म अनुसार रुद्राभिषेक तथा शान्ति पाठ गर्ने भएकी छिन् । मुक्तिनाथ धाम निर्माण समितिका अध्यक्ष अनिल पाण्डेका अनुसार सो पूजाका लागि विशिष्ट व्यक्ति हिमानी ट्रस्टका शाह हुनेछन् ।
उनले भने, “राजनीति हामी जान्दैनौँ, तर नेपालको राजतन्त्रले हिन्दु धर्मको संरक्षण, हिन्दु र बौद्ध धर्मबीचको सहिष्णुताको प्रवर्द्धन गरेको र मुलुकमा सबै धर्म र सामाजिक आस्थालाई प्रवर्द्धन गर्न सघाएको सबैलाई थाहै छ’ अध्यक्ष पाण्डेले भने”, “अहिले नेपालमा राजतन्त्र छैन, तर सत्तामा रहँदा शाह परिवारले यस कार्यका लागि महत्त्वपूर्ण भूमिका खेलेको र आज पनि लाखौं नेपालीले धार्मिक विश्वासको विस्तारमा यस परिवारको सक्रियता रहोस् भन्ने चाहेको बुझेर हामीले पूर्वयुवरानी हिमानी शाहलाई पूजा–अर्चनाका लागि आह्वान गरेका हौँ ।”
नर्दन क्यालिफोर्निया क्षेत्रका हिन्दु र बौद्ध धर्ममा आस्था राख्ने नेपालीहरू पूर्व युवरानी शाहका साथ पूजामा सहभागी हुन उत्साहका साथ प्रतीक्षारत छन् ।
मुक्तिनाथ मन्दिरको स्थापना र भगवानको प्राण–प्रतिष्ठापछि नेपाली मात्र होइन भारतीय र अन्य मुलुकमा रहेका हिन्दु तथा बौद्ध धर्मावलम्वीहरु ओइरिएको अध्यक्ष पाण्डेले जानकारी दिए।
