चैत्र २३, काठमाडौं । १ अप्रिलदेखि भारतको खुला बजारबाट रातिको समयमा विद्युत् आयात बन्द भएपछि नेपाल विद्युत् प्राधिकरणले देशभरिका उद्योगहरूमा १२ घण्टाभन्दा बढी लोडसेडिङ गर्न सुरु गरेको छ । रातको समयमा उपलब्ध गर्न सकिने ग्यासबाट उत्पादित विद्युत् महँगो हुने भएकाले सो विधुत् नेपालमा वितरण गर्नुभन्दा प्राधिकरणले उद्योगहरूमा १२ घण्टाभन्दा बढी लोडसेडिङ् गर्न थालेको हो ।
रातको समयमा नेपालले ग्यासबाट उत्पादित विद्युत् मात्रै आयात गर्न पाउँछ, जुन खुला बजारभन्दा महँगो पर्न जान्छ । ग्यासबाट उत्पादित विद्युत् प्रतियुनिट ८ देखि १० भारुसम्म पर्छ । महँगोमा विद्युत् आयात गरेर नेपालमा वितरण गर्नुभन्दा प्राधिकरणले उद्योगहरूमा लोडसेडिङ गरेको हो ।
कुनै–कुनै क्षेत्रमा १५ घण्टासम्म पनि लोडसेडिङ भइरहेको छ ।
प्राधिकरणले लोडसेडिङ नै गर्नुपरे पनि तालिका नै निकालेर गरिदिए काम गर्न सजिलो हुने नेपाल उद्योग वाणिज्य महासंघ मधेश प्रदेश अध्यक्ष अशोककुमार टेमानीले बताए ।
उद्योग संगठन मोरङका निवर्तमान अध्यक्ष सुयश प्याकुरेल पनि तालिका विना लामो समय लोडसेडिङ हुँदा उद्योगी मारमा परेको बताउँछन् ।नेपाल विद्युत प्राधिकरणका प्रवक्ता चन्दनकुमार घोषका अनुसार लोडसेडिङ नै भनेर गरेका छैनौँ । तर, रातको १२ बजेसम्म लोड व्यवस्थापनमा समस्या परिरहेको र मौसममा सहयोग गर्ने देखिएकाले यो समस्या पनि केही दिनमा समाधान हुने अपेक्षा छ ।
भारतले मार्च अन्तिममा विद्युत् आयातसम्बन्धी सम्झौता नवीकरण गर्दा खुला बजारबाट दिनको समय मात्रै विद्युत् आयात गर्न पाउने किसिमको व्यवस्था गरेको छ ।
अहिले पिक समयमा १ हजार ८ सय ३३ मेगावाट विद्युत् माग रहेको प्राधिकरणले जनाएको छ । तर, दिनको समयमा कुल विद्युत् आपूर्ति १ हजार ३ सय ४३ मेगावाट छ । भारतबाट दिनको समयमा ४ सय मेगावाट विद्युत आइरहेकोमा राति त्यो आउँदैन । त्यसो हुँदा रातको समयमा विद्युत्को चरम अभाव भइरहेको छ ।