चैत्र २७, काठमाडौं । राष्ट्रिय प्रजातन्त्र पार्टीले सरकारसमक्ष बुझाएको मागपत्र कार्यान्वयन नभएको भन्दै आज काठमाडौंमा जनप्रदर्शन गरेका छन् । गत फागुन ९ गते प्रधानमन्त्री पुष्पकमल दाहाल ‘प्रचण्ड’लाई बुझाएको ४० बुँदे मागपत्र कार्यान्वयन नभएको भन्दै माग पूरा गराउन दबाव दिने उद्देश्यले राप्रपाले काठमाडौंमा बृहत् जनप्रदर्शन गरेका हुन् ।
राप्रपा अध्यक्ष राजेन्द्र लिङ्देनले ५० हजारभन्दा बढीको सहभागिता हुने जनप्रदर्शन शान्तिपूर्ण हुने जानकारी दिएर सुरक्षाको उचित प्रबन्ध गर्न सरकारको ध्यानाकर्षण गराएका छन्। उनले आफूहरुको प्रदर्शनलाई रोक्न सरकारले निषेधाज्ञा जारी गरे राप्रपाले त्यसको प्रतिकार गर्ने चेतावनी दिएका छन्।
प्रदर्शनलाई लक्षित गरी काठमाडौंमा करिब ६ हजार प्रहरी परिचालन गरिएको छ ।
भृकुटीमण्डपबाट सुरु हुने जनप्रदर्शनले शहरका विभिन्न स्थानको परिक्रमा गरेर सभामा परिणत हुने बताइएको छ।
राप्रपाले विभिन्न माग राख्दै प्रधानमन्त्रीलाई ४० बुँदे मागपत्र समेत बुझाएको थियो। राप्रपाले गणतन्त्र खारेज गर्नुपर्ने, राजासहितको शासन व्यवस्था हुनुपर्ने, धर्मनिरपेक्षता खारेज गरी नेपाललाई हिन्दू राष्ट्र घोषणा गर्नुपर्ने लगायतका माग राख्दै आएको छ । अभिभावकीय भूमिकामा संवैधानिक राजसंस्था हुनुपर्ने, सर्वधर्म समभाव, पूर्ण धार्मिक स्वतन्त्रतासहितको वैदिक सनातन धर्मसापेक्ष हिन्दू अधिराज्य घोषणा गर्नुपर्ने, संगठित, योजनाबद्ध, प्रलोभन तथा छलकपटपूर्ण धर्मान्तरणमा तत्काल रोक्नुपर्ने, प्रदेश संरचनाको खारेजी र दुई तहको सरकार– केन्द्र र अधिकारप्राप्त स्थानीय तह बनाउनुपर्ने लगाएतका रहेका छन्।
प्रदर्शनको पूर्वसन्ध्यामा राप्रपा सम्बद्ध नेपाल सनातन धर्मसँस्कृति संगठनले सोमबार भृकुटीमण्डपबाट गौशालासम्म पैदलयात्रा गर्दै गणतन्त्रको प्रतिकात्मक पुत्ला जलाएको थियो ।
