वैशाख २६, काठमाडौं । नेपाल कम्युनिस्ट पार्टी (माओवादी केन्द्र) का केन्द्रीय सल्लाहकार प्राध्यापक खगेन्द्र खड्काको निधन भएको छ । मंगलवार फोक्सो र घाँटीको क्यान्सर रोगबाट ग्रसित रहेका खड्काको  नेपाल क्यान्सर हस्पिटल एण्ड रिसर्च सेन्टर हरिसिद्धि ललितपुरमा निधन भएको हो । 

माओवादी केन्द्रका महासचिव देव गुरुङले शोक वक्तव्य जारी गर्दै सल्लाहकार खड्काको निधनले सिङ्गो पार्टी स्तब्ध भएको जनाएका छन् । ‘प्राध्यापक खगेन्द्र खड्काको निधनबाट पार्टी, जनता र राष्ट्रका लागी अपूरणीय क्षति भएको छ । राष्ट्रले एक बौद्धिक होनहार व्यक्तित्व गुमाएको छ’, माओवादीले भनेको छ । 

सल्लाहकार खड्काको अन्तिम श्रद्धाञ्जली र अन्त्येष्टि बुधवार साँझ ६ बजे पशुपति आर्यघाटमा गर्ने कार्यक्रम रहेको माओवादीले जनाएको छ ।

विक्रम संवत् २००८ साल असोज १२ गते उदयपुरको बेलका नगरपालिका –४ मा जन्मिएका खड्का लामो समय कम्युनिस्ट आन्दोलनमा आबद्ध रहँदै २०६४ सालमा नेपाल कम्युनिस्ट पार्टी (माओवादी केन्द्र) मा  केन्द्रीय सल्लाहकारको जिम्मेवारीमा पाएका थिए । 

पछिल्लो समय फोक्सो र घाँटीको क्यान्सर रोगबाट ग्रसित भई उपचार गर्दै आएका खड्का लामो समय त्रिभुवन विश्वविद्यालयमा राजनीतिक शास्त्रको प्राध्यापक भई त्रिचन्द्र क्याम्पसबाट सेवा निवृत्त भएका थिए ।