जेठ ११, काठमाडौं । जारी पर्वतारोहण सिजनमा सगरमाथामा मात्र ५ आरोहीको मृत्यु भएको छ । मृत्यु हुनेमा युखजर्गल सिडेनडम्बा, प्योरभिस्रन खाग्बाजाभ, ग्याब्रियल भायोरेल तबरा, जोसुआ चेरियट किरुई र विनोदबाबु बस्ताकोटी रहेका छन् ।

युखजर्गल सिडेनडम्बा, प्योरभिस्रन खाग्बाजाभ, उनीहरूको १३ मेका दिन साउथ समिटमा मृत्यु भएको विभागले जनाएको छ । क्याम्प थर्डमा रोमानियाका नागरिक ४६ वर्षीय ग्याब्रियल भायोरेल तबराको २१ मेका दिन टेन्टमा सुतिरहेको अवस्थामा मृत्यु भएको छ । केन्याका नागरिक ४० वर्षीय जोसुआ चेरियट किरुईको समेत सोही दिन चुचुरो नजिकै शव भेटिएको विभागले जनाएको छ । सोही दिन कास्कीका विनोदबाबु बस्ताकोटीको साउथ कोल नजिकै ८२ सय मिटरमा ज्यान गएको हो ।

पर्यटन विभागले बिहीवार साँझ सार्वजनिक गरेको विवरण अनुसार नेपाली सहयोगी र विदेशी आरोहीहरूको विभिन्न कारणले मृत्यु भएको हो ।

विभागका अनुसार तीन जना आरोही र सहयोगी भने हराइरहेका छन् । २१ तारिखका दिन बेलायती नागरिक ४० वर्षीय ड्यानियम पौल हिलारी स्टेपबाट झरेको र सोही स्थानमा हराइरहेको विभागले जनाएको छ । उनको साथमा रहेका सहयोगी पासतेन्जी शेर्पा समेत हराइरहेका छन् । केन्याली नागरिकको साथमा रहेका ङवाङ शेर्पा समेत चुचुरो नजिकबाट हराइरहेको विभागको विवरणमा उल्लेख छ ।

विभागका अनुसार बिहीवारसम्म कुल ५७० जना भन्दा बढी आरोही र सहयोगीहरुले सगरमाथाको सफल आरोहण गरेका छन् ।