जेठ २४, काठमाडौं । ललितपुर महानगरपालिकाले नगरवासीको गुनासो, सुझाव र समस्या तत्काल सुनुवाइका लागि हरेक वडामा दैनिक पचास जना नगर प्रहरी परिचालन गर्ने भएको छ ।महानगरले आज एक कार्यक्रमको आयोजना गर्दै 'सुन्दर ललितपुर नगरी, घर घरमा नगर प्रहरी' भन्ने मूल नाराको साथ नगर प्रहरी खटाइने योजनाको उद्घाटन गरेको हो ।
कार्यक्रमको समुद्घाटन गर्दै ललितपुर महानगर प्रमुख चिरिबाबु महर्जनले नगर प्रहरीको उदाहरणीय कदमले नगर बासीको महानगर प्रतिको सम्बन्ध अझ प्रगाढ हुने बताए । घर-घरमा नगरप्रहरी अभियानले वडाअध्यक्षहरुलाई पनि सहयोग पुग्ने र घर-घरमा पुगेर संकलन गरिएका गुनासा र समस्याबारे नगर प्रहरीले हरेक साता नगर प्रमुख महर्जनलाई जानकारी गराउने उनले जानकारी दिए ।
योजना अन्तर्गत दैनिक पचास जना नगर प्रहरी हरेक वडामा खटिने ललितपुर महानगर प्रहरी बलका प्रमुख सिताराम हाछेथुले जानकारी गराए ।
उक्त अभियानमा दैनिक ५० जना नगर प्रहरी खटिनेछन् । तीमध्ये समूह-समूह बनाएर घर-घरमा नगर प्रहरी पठाइने छ । एउटा समूहमा ५ जना नगर प्रहरी रहनेछन् । यसो गर्दा दैनिक ३ हजारभन्दा बढी घरमा नगर प्रहरी पुग्ने नगर प्रहरी प्रमुख सिताराम हाछेथुले बताए ।
द्घाटन कार्यक्रममा बोल्दै ललितपुरका प्रहरी प्रमुख शेखर खनालले नगरप्रहरीसँग हातेमालो गरेर काम गर्दाशान्ति सुरक्षा कायम गर्न सजिलो हुने, विपद् व्यवस्थापन र वातावरण संरक्षण लगायतका विषयमा उपलब्धिमूलक काम गर्न सकिने बताए ।
नगरप्रहरीले नगरपालिकाका सेवाहरु नगरवासीले लिएर नलिएको बुझ्ने छ भने नि:शुल्क दमकल, ढल निकास, शव वाहन, फुटपाथलगायत सेवाबारे जानकारी गराउने छ । नगरवासीका समस्या पहिचान गर्न, जनताले कर तिरे/नतिरेको बुझ्न, महानगरको सेवाको पहुँच बुझ्न मद्दत पुर्याउने छ ।