जेठ २५, काठमाडौं । दाङको तुलसीपुरमा नेपाली सेनाका एक अमलदारले कानुनी रुपमा छोडपत्र गर्ने सहमति गरेको ११ दिनपछि श्रीमतीको हत्या गरेका छन् । आज बिहान दाङ जिल्लाको तुलसीपुर उपमहानगरपालिका–६ डुम्रीगाउँस्थित घरको कोठामै श्रीमतीको हत्या गरेको आरोपमा सेनाका अमलदार ३६ वर्षीय सालिकराम बुढाथोकी पक्राउ परेका छन् ।

शालिकराम सल्यानको कपुरकोट–६ निवासी हुन् । उनी अहिले सेनाको ज्वालदल गण बारामा कार्यरत थिए ।

गत जेठ १४ गते यी दुईजनाबीच छोडपत्रको सहमतिमा हस्ताक्षर भएको थियो । तर आर्थिक लेनदेन मिलाउन बाँकी थियो । त्यही लेनदेन मिलाउन भन्दै शालिकराम शुक्रवार बिहान टीकाको कोठामा पुगेका थिए ।

इलाका प्रहरी कार्यालय तुलसीपुरका प्रहरी निरीक्षक तथा सूचना अधिकारी प्रकाश थापाका अनुसार टीकाको कोठामा बाँकी लेनदेन मिलाउन पुगेका शालिकरामले त्यहीँ झगडा झिकेका थिए । झगडा परेपछि टीका ज्यान जोगाउन भागेर छिमेकीको कौसीमा चढेकी थिइन् । करिब ३० वर्षीया टीका रावत ज्यान जोगाउन डेरा कोठाबाट भागेर छिमेकीको घरमा पुगे पनि शालिकराम त्यहीँ पुगेर धारिलो हतियार प्रहार गरी हत्या गरेको प्रहरीले जनाएको छ ।

शालिकराम शान्ति सेनाबाट आउँदा श्रीमती अर्कैसँग लागेको थाहा पाएपछि शालिकरामले छोडपत्र गरेर पनि ज्यान लिएको हुन सक्ने प्रहरी निरीक्षक थापाले बताए ।

प्रहरीका अनुसार टीकासँगको सम्बन्धमा रहेका अछामको कमलबजार नगरपालिका घर भई तुलसीपुर दाङमा कार्यरत २९ वर्षीय सैनिक जवान आर्यन थापालाई खुकुरी प्रहार गरेका थिए । खुकुरी प्रहारबाट गर्धन र टाउकोमा गम्भीर चोट लागेको छ । उनको अहिले राप्ती प्रादेशिक अस्पताल तुलसीपुरमा उपचार हुँदै छ । शालिकराम र टीकाबीच छोडपत्र भएपछि आर्यन बिहेको तयारीमा रहेको र टीकासँग आफू सँगै बस्दै आएको बयान आर्यनले प्रहरीलाई दिएका छन् ।

हाल शालिकराम इलाका प्रहरी कार्यालय तुलसीपुरको नियन्त्रणमा छन् ।