२१ असार, काठमाडौं । काठमाडौंको सुरक्षा जिम्मा पाएको जिल्ला प्रहरी परिसर काठमाडौंको सुविधायुक्त नयाँ भवन तयार भएको छ ।
कुल लागत ८० करोडमा बनेको आठ तलाको भद्रकालीस्थित भवनबाट परिसरले असार २६ बाट नियमित सेवा प्रवाह गर्ने भएको प्रहरी परिसर काठमाडौंका प्रवक्ता एसपी नवराज अधिकारीले जानकारी दिनुभयो ।
कुल क्षेत्रफलमध्ये अर्थात् १५ रोपनी जग्गामा भवन ‘स्ट्रक्चर’ मात्रै ६ रोपनीमा फैलिएको छ ।
काठमाडौं परिसरका अनुसार भवनको मुख्य भागमा परिसरमा कार्यरत एसएसपीदेखि प्रहरी निरीक्षकसम्मको छुट्टाछुट्टै कक्ष छन् । पिलरअनुसार विभाजन गरिएका कार्यकक्ष दर्ता हुने मुद्दा र सेवाग्राहीको चापका दृष्टिले निर्माण गरिएका छन् । भवनभित्र प्रहरीका लागि ब्यारेकसमेत छ । भवनमा हिरासत कक्ष निर्माण गरिएको छ । कार्यालयमा प्रहरीका लागि व्यायाम कक्ष रहनेछ ।प्रहरीका लागि सुविधासम्पन्न मेस, टेलरिङ कक्ष, नास्ता कक्ष तथा मनोरञ्जन कक्ष पनि भवनभित्र निर्माण गरिएका छन् । सर्वसाधारणको उजुरी लिने कक्षसमेत रहनेछ ।
भवनको सम्पूर्ण भाग समेट्ने गरी सिसीटिभी जडान, अभियुक्तसँग बयान लिन अन्तर्राष्ट्रियस्तरको ‘इट्रोगेसन रुम’, अभियुक्तको म्याद थप हिरासत कक्षबाटै हुने व्यवस्था मिलाइएको छ । भिडियो कन्फरेन्स गर्न सकिने गरी अत्याधुनिक हलको डिजाइनसमेत गरिएको छ । ‘मास अरेस्ट’मा परेकाहरूलाई राख्ने छुट्टै हिरासत कक्ष छ ।
पार्किङका लागि अन्डरग्राउन्डमा ठाउँ छुट्याइएको छ । जहाँ एक सय गाडी र दुई सयभन्दा बढी मोटरसाइकल अटाउँछन् । भवनभित्र एकैपटक दुई सयजना अटाउने कन्फरेन्स हल छ ।
भवनको प्रत्येक कक्षलाई अवलोकन गर्दा वास्तु विज्ञानलाई समेत ध्यान दिइएको छ । विशेषगरी कार्यालयका प्रमुख, उपप्रमुख तथा विशेष जिम्मेवारीमा रहने अधिकृतको कार्यकक्ष निर्माणमा ध्यान दिइएको छ । भवनको प्रवेशद्वार पनि आकर्षक बनाइएको छ ।
वसन्तपुरस्थित हनुमानढोकामा रहेको परिसर १२ वैशाख ०७२ को भूकम्पपछि विस्थापित भएर टेकुमा पुगेको थियो । टेकुस्थित नेसनल ट्रेडिङ (हाल नेपाल आयल निगमको स्वामित्व)को भवन र खाली रहेको जग्गामा अस्थायी रूपमा सारिएको थियो ।