२४ असार, काठमाडौं । महाकालीलगायत कञ्चनपुरका अन्य विभिन्न नदीनालामा आएको बाढीका कारण करिब ९ सय परिवार विस्थापित भएका छन् । अविरल वर्षासँगै आएको बाढीले डुबान भएपछि विस्थापित हुनेको संख्या अझै बढ्न सक्ने देखिन्छ । 

जिल्ला प्रहरी कार्यालयका अनुसार सोमवार बिहानसम्म ८ सय ९१ परिवारका ३ हजार २९३ जनालाई सुरक्षित स्थानमा सारिएको छ । दोधारा चाँदनी, भीमदत्त नगरपालिका, बेदकोट, बेलडाडी, बेलौरी र पुनर्वासमा बाढीका कारण बढी डुबान भएको छ । डुबानमा फसेका २९ जनाको सकुशल उद्धार गरिएको प्रहरीले जनाएको छ ।

भुजेला खोलाको बाढी बस्तीमा पस्दा भीमदत्त नगरपालिका ११, १२ र १३ का १ सयभन्दा बढी परिवार विस्थापित भएका छन् । दोधारा चाँदनी नगरपालिकामा महाकाली नदीको बाढीले जोगबुडाको बाढी थुनिँदा कुतियाकभर, शान्तिटोल, निशानी टोल, बैदीफाँटा, सुन्दरनगर र कञ्जभोजलगायतका बस्ती डुबानमा डुबानमा परेका छन् । 

विस्थापित परिवार वडा कार्यालय र विद्यालयमा बसेका छन् ।

जिल्ला सदरमुकाम महेन्द्रनगर बजारसमेत डुबानमा परेकोले सयौं परिवार विस्थापित भएको प्रहरीले जनाएको छ । बजार क्षेत्रमा पानीको निकास नहुने र नदी नालाको पानीसमेत बजारमै पसेका कारण डुबान भएको हो ।बजार क्षेत्रमा खोलानाला मिचेर घर निर्माण गरेका कारण डुबान भएको स्थानीय बताउँछन् । 

महाकालीमा पानीको बहाव दुई लाख ४० हजार क्युसेक नाघेपछि शारदा ब्यारेजका नेपालतर्फका सबै ढोका खोलिएका छन् ।