साउन्ड टेबल टेनिसमा कुशल र सिर्जनालाई स्वर्ण

२४ असार, काठमाडौं । पारा तथा विशेष खेलकुदअन्तर्गत साउन्ड टेबल टेनिस प्रतियोगितामा कुशल न्यौपाने र सिर्जना चौधरीले स्वर्ण पदक जितेका छन् ।

सिंगल्स फाइनलमा पुरुषमा कुशल तथा महिलामा सिर्जना पहिलो स्थान हात पार्न सफल हुनु भएको हो ।

लैनचौरस्थित राष्ट्रिय टेबलटेनिस प्रशिक्षण केन्द्रमा भएको पुरुष सिंगल्स फाइनलमा कुशल कृष्ण दाहाललाई ११–६, ११–८ को सोझो सेटमा पराजित गर्दै स्वर्ण पदक जित्न सफल हुनु भएको हो । युवराज लामा र प्रसाईं रुम्बा तेश्रो स्थान हासिल गरेका छन् ।

राष्ट्रिय खेलकुद परिषद् (राखेप) को आयोजना तथा नेपाल दृष्टिविहीन टेबलटेनिस संघको व्यवस्थापनमा भएको प्रतियोगिताको महिला सिंगल्स फाइनलमा भने सिर्जनाले रश्मी डंगोललाई ११–७, ११–४ को सोझो सेटमा हराएर स्वर्ण पदक जित्न सफल हुनु भएको हो । प्राप्ति उपाध्याय र संगिता घिमिरे तेश्रो स्थानमा रहे ।