२५ असार, काठमाडौं । महिला एसिया कप अगाडिको अभ्यास खेलमा नेपाल श्रीलंकासँग पराजित भएको छ। एसिया कप खेल्न श्रीलंका पुगेको महिला राष्ट्रिय क्रिकेट टिमले श्रीलंका डेभलपमेन्टसँग ‘डकवर्थ एन्ड लुइस’ नियमका आधारमा ३३ रनले पराजित भएको हो ।
वर्षाले प्रभावित खेलमा नेपालले १५ ओभरमा ९६ रनको नयाँ लक्ष्य प्राप्त गरेको थियो । उक्त लक्ष्य पछ्याउने क्रममा नेपालले पूरै ओभर ब्याटिङ गरे पनि नौ विकेट गुमाउँदै ६३ रन मात्र बनाउन सक्यो । नेपालका लागि रुबिना क्षेत्रीले १७ र सीता रानामगरले ११ रन बनाउनुभयो ।
श्रीलंकाका लागि दिवमी भिहान्गाले तीन र एम शिहानीली दुई विकेट लिनुभयो ।
त्यसखअघि टस हारेर ब्याटिङको निम्तो पाएको श्रीलंकन टोलीले निर्धारित २० ओभरमा आठ विकेट गुमाउँदै ११८ रनको लक्ष्य प्राप्त गरेको थियो । श्रीलंकन टोलीका लागि दुल्हानी र नुथयान्गानाले समान २७ रन बनाउनुभयो ।
नेपालका लागि सबनम राईले तीन र राजमति ऐरीले एक विकेट लिनुभयो ।
एसीसी महिला एसिया कप जुलाई १९ देखि २८ (साउन ४ देखि १३ गते)सम्म श्रीलङ्कामा आयोजना हुँदैछ । महिला एसिया कपको नवौँ संस्करणमा आठ वटा टोलीको सहभागिता रहेको छ ।
नेपालले दोस्रो खेल जुलाई २१ तारिखमा पाकिस्तानसँग डम्बुलामै खेल्नेछ ।
महिला एसिया कप यात्रामा होमिने नेपाली टोलीमा ईन्दू बर्मा (कप्तान), रुविना क्षेत्री, सीता रानामगर, बिन्दू रावल, कविता कुँवर, पूजा महतो, कविता जोशी, सम्झना खड्का, काजोल श्रेष्ठ, सबनम राई, राजमती ऐरी, ममता चौधरी, कृतिका मरासिनी, रोमा थापा र डली भट्ट रहेका छन् ।
