२६ असार, काठमाडौं । मंगलवारदेखि मनाङमा यार्तुङ मेलाको रौनक सुरु भएको छ ।
यार्तुङ पर्वको अवसरमा टङ्की मनाङ, मनाङ समाज र ङिस्याङ युवा क्लबको संयुक्त आयोजनामा संरक्षण क्षेत्र व्यवस्थापन समिति मनाङ, टङ्की मनाङ र पर्यटन व्यवस्थापन उपसमिति मनाङको संयुक्त सहयोगमा तारा हान्ने खेललाई ग्राण्ड यार्तुङ २०८१ नाम दिइ यार्तुङ मेला आयोजना गरिएको हो ।
जनप्रिय युवा क्लब मुक्तिनाथ मुस्ताङबाट ए र बी गरी दुई टिम, मनाङ ङिस्याङ गाउँपालिकाको तिलिचो युवा क्लब, खाङसार युवा क्लब, ङिस्याङ युवा क्लब मनाङ, भ्राका युवा क्लब, पिसाङ युवा क्लब गरी जम्मा सात टिमले भाग लिएका छन् ।
यार्तुङ पर्व
मनाङमा पाँच दिनसम्म मनाइने यार्तुङ पर्वको विशेष महत्व छ । मनाङ गाउँबाट मनाउन सुरु भएपछि मात्रै यार्तुङ अन्य स्थानमा सुरु गर्ने प्रचलन रहेको छ । यस पर्वंलाई घोडे जात्रा पनि भनिन्छ । किनभने यो पर्व मनाउँदा मनाङवासीहरुले घोडाहरुलाई संयुक्तरुपमा पुज्ने, गाउँ परिक्रमा गर्ने गर्दछन् ।
पहिला पहिला यातायातको सुविधा नहुँदा यहाँका स्थानीयले खाद्यान्न, घाँस, दाउरा, लेकबाट जडीबुटी सङ्कलन, औषधि ढुवानी, बिरामीलाई अस्पताल लैजान समेत घोडाको प्रयोग गरिँदै आएको यसरी स्थानीयहरुको दुःख–सुःखमा साथ दिने घोडाप्रतिको माया तथा प्रेमको प्रतीको रुपमा यस पर्वलाई मनाउँछन् । वर्षायाम सकिन लाग्दा मनाइने भएकाले खेतीपाती वालीनाली राम्रो होस् र रोगव्याधि नलागोस् भन्ने कामनाकासाथ यार्तुङ मनाइने यहाँका स्थानीय बताउँछन् । पाँच दिनसम्म मनाइने यस पर्वमा युवाहरु परम्परागत भेषभुषामा सजिएर एक ठाउँमा भेला भई पूरा गाउँ परिक्रमा गर्ने चलन छ । पूरा गाउँ परिक्रमा गरेपश्चात गुम्बामा महिलाहरु सगुन, खादा लिएर स्वागत गर्ने गर्दछन् र परम्परागत बाजागाजाका साथ मौलिक गीत गाउँदै यार्तुङ पर्व मनाइन्छ । यार्तुङको चौथो दिनमा यहाँका युवाले आफूलाई मन परेका युवतीलाई आफ्नो घोडामा राखेर गुम्बा घुमाउने गर्दछन् । अन्तिम दिन बिहानैदेखि गुम्बामा पूजापाठ शुरु हुन्छ ।
यस पर्व मनाउने प्रचलनले यहाँ आउने पर्यटकलाई समेत आकर्षित गरेको छ । मनाङको परम्परागत धार्मिक आस्थालाई समेत संरक्षण गरेको छ । यस पर्वको माध्यमबाट गाउँ, समाज र मानिस बीचमा एकापसमा सामाजिक सद्भावको विकास गरिरहेको स्थानीयको भनाइ छ ।
