तामाङ भाषा सिक्ने एप बनाउन समझदारी

साउन १४, काठमाडौं । तामाङ भाषा सिक्ने एप बनाउन समझदारी भएको छ । तामाङ भाषाका शब्द र वाक्य प्रयोगलाई सिकाउन एप बन्ने भएको हो । काठमाडौँ विश्वविद्यालय र इन्स्टिट्यूट फर सोसियो कल्चरल रिसर्च एन्ड एनालिसिससँग एप्लिकेशन सफ्टवेयर (एप) बनाउन समझदारी भएको हो । एप बने पछि तामाङ भाषा सिक्न र सिकाउन सजिलो हुनेछ ।

काठमाडौँ विश्वविद्यालयका तर्फबाट सह-प्राध्यापक डा. बालकृष्ण बलले र इन्स्टिट्यूट फर सोसियो कल्चरल रिसर्च एन्ड एनालिसिसकातर्फबाट संयोजक नवराज लामाले एक समारोहका बिच दुई पक्षीय समझदारीमा हस्ताक्षर गर्नु भएको छ ।

तामाङ भाषाको आधारभूत शब्द र शब्दको वाक्यसहित तयार गरिने एप शुरुमा देवनागरी र अङ्ग्रेजी लिपिमा तयार हुनेछ । कालान्तरमा तामयीग लगायत अन्य लिपिमा विस्तार गरिनेछ ।

सो एप निर्माणमा भाषाविद् अमृत योञ्जन तामाङले शब्द सङ्ग्रह गर्नू भएको छ । तामाङ भाषा सिक्न खोज्ने भाषा प्रेमीलाई लक्षित गरी बनाइने यो एप्लिकेशन सफ्टवेयर (एप) कम्प्युटर वा मोबाइलमा सजिलै डाउनलोड गर्न सकिने छ । यो एप बनाउने कार्य हाल ६० प्रतिशत सकिएको संयोजक लामाले जानकारी दिनु भयो ।