१५ साउन, काठमाडौं । कैलालीको धनगढीमा अस्पताल खोल्ने अनुमति लिएर बनाइएको चर्च उपमहानगरपालिकाले डोजर परिचालन गरेर भत्काएको छ । धनगढी उपमहानगरपालिका–७ मनेहरामा लेट मेइन धनगढी प्रा.लि.ले घर नक्सा पास नगरी संरचना बनाएर चर्च चलाएपछि डोजर परिचालन गरी भत्काइएको हो ।

अस्पताल भन्दै चर्च चलाउने लेट मेइन धनगढी र नेपाल लाइफ वर्ड मिसनले निर्माण गरेको दुईतले भवन नगर प्रहरीको टोलीले भत्काएको हो ।  भवन नक्सा पासविपरीतका संरचना बनाएको पाइएपछि भत्काइएको उमपहानगरपालिकाका मेयर गोपाल हमालले बताउनुभएको छ । 

वडा कार्यालयबाट अस्पताल बनाउने भन्दै इजाजत लिएको भवनमा ‘भजन मण्डली’ चलेपछि स्थानीयहरु आक्रोशित बनेका थिए । उनीहरुले उपमहानगरमा उजुरी पनि हालेका थिए । संगती गराउने लेट मेइन धनगढी प्रालिलाई महानगरले २४ घण्टा भित्र लिखित जवाफ दिन पत्र पनि काटेको थियो । तर, जवाफ नआएपछि भवनमा डोजर चलाइएको हो ।

अस्पतालमा चर्च सञ्चालन गरिएको भन्दे स्थानीयहरुले आपत्ति जनाएपछि कुटपिटमा उत्रिएका ३ जनालाई प्रहरीले पक्राउ गरेर कारवाही अघि बढाएको छ ।