२४ साउन, काठमाडौं । प्रत्येक वर्ष साउनभर गुल्मीको प्रसिद्ध धार्मिक तथा पर्यटकीय स्थल रेसुंगामा लाग्ने मेलामा यो वर्ष श्रीमदभागवत महापुराण एक साता सञ्चालन गर्ने भएको छ । रेसुंगा संरक्षण समितिद्वारा २६ साउनदेखि एक साता महापुराण सञ्चान गरिने भएको हो ।
आयोजकका अनुसार महापुराणको पूर्वसन्ध्यामा २५ साउनमा तम्घासबाट विशाल शोभा कलशयात्रा हुने छ।
श्रीमदभागवत महापुराणका लागि भारत राजस्थानका योगी शम्भुनाथजी महाराज आउँदै हुनुहुन्छ । उनले गत वर्ष पनि रेसुंगा र आयोध्याको धार्मिक सम्बन्ध प्रगाढ बनाउन विशाल सन्त सम्मेलन तथा महायज्ञ गर्नुभएको थियो।
गत वर्षको विशाल महायज्ञले धार्मिक रूपमा रेसुंगालाई थप उचाइमा पुर्याएको र आर्थिक रूपमा समेत २५ लाख कोषमा रकम जुटाउन सकिएकाले आफूहरूमा पनि ऊर्जा थपिएको रेसुंगा संरक्षण समितिका अध्यक्ष सुरेशचन्द्र भुसालले बताउनुभयो।
महापुराणका लागि सम्पूर्ण व्यवस्थापनको काम अन्तिम चरणमा पुगिसकेको रेसुंगा संरक्षण समितिका सचिव गोपाल पन्थीले जानकारी दिनुभयो । मेला अवधिभर धार्मिक प्रवचन, भक्तिसंगित, सामूहिक रुद्री, ग्रहजपलगायतका कार्यक्रम नियमित रूपमा सञ्चालन भएको रेसुंगा संरक्षण समितिका सहसचिव यज्ञप्रसाद पन्थीले बताउनुभयो ।
धार्मिक, ऐतिहासिक तथा पर्यटकीय दृष्टिकोणबाट निकै महत्त्वपूर्ण मानिने रेसुंगामा हरेक वर्ष साउनेसंक्रान्तिदेखि साउन महिनाभर नै मेला लाग्ने गरेको छ। साउन महिनामा रेसुंगामा रहेको पोखरीमा स्नान गरेमा सम्पूर्ण पाप नष्ट भएर पुण्य तथा समृद्धि प्राप्त हुने धार्मिक जनविश्वास रहेको छ ।
