चितवन राष्ट्रिय निकुञ्जमा अनलाइन टिकेटिङको तयारी
१२ भाद्र, काठमाडौं । चितवन राष्ट्रिय निकुञ्ज चालु आर्थिक वर्षदेखि अनलाइन भुक्तानी प्रणालीमा जाने भएको छ ।
निकुञ्जका प्रमुख संरक्षण अधिकृत डिलबहादुर पुर्जा पुनका अनुसार सफ्टवेयर जडान गर्ने सामग्रीहरु आइसकेको र तालिमका लागि जनशक्ति तयार गर्ने तयारी थालिएको छ।
निकुञ्ज विभागले नै ईसेवासँग निकुञ्ज घुम्न आउने पर्यटकहरूलाई अनलाइन टिकट प्रणालीमार्फत भुक्तानी दिन मिल्ने व्यवस्था गर्न सम्झौता गरेको छ । विभागका उपमहानिर्देशक वेदकुमार ढकालले अहिले पाइलट प्रोजेक्टका रूपमा निकुञ्जका सौराहा पोष्टबाट अनलाइन टिकट र भुक्तानीको व्यवस्था मिलाउन लागिएको बताउनुभयो ।
हाल निकुञ्जका विभिन्न ७ वटा पोष्टहरुबाट कर्मचारीहरुले हस्तलिखित टिकट काट्दै आएका छन् । निकुञ्जका प्रमुख संरक्षण अधिकृत पुनले निकुञ्ज प्रवेश गर्ने आन्तरिक तथा बाह्य पर्यटकमध्ये सबैभन्दा धेरै पर्यटक सौराहाबाट नै आउने भएकाले सौराहालाई केन्द्रित गरेर अनलाइन भुक्तानी प्रणाली जडान गर्न लागिएको जानकारी दिनुभयो ।
चितवन राष्ट्रिय निकुञ्ज अनलाइन टिकेटिङ्ग सिस्टममा नजाँदा निकुञ्ज प्रवेश गर्ने पर्यटक र होटल व्यवसायीहरूले टिकट काट्न बिहानैदेखि लाइनमै बस्नुपर्ने दुःख र झन्झट झेल्दै आएका छन् । अब भने केही सहज हुने विश्वास लिइएको निकुञ्जका प्रमुख संरक्षण अधिकृत पुनले बताउनुभयो ।
