१४ भाद्र, काठमाडौं । अखिल नेपाल फुटबल संघ (एन्फा) ले सुविधा सम्पन्न अन्तर्राष्ट्रिय रंगशाला बनाउन सरकारसँग जग्गा माग गरेको छ । एन्फा कार्यसमितिको मंगलवार र बिहीवार बसेको बैठकले नेपालमा करिब ४० हजार दर्शक अट्ने फुटबल रंगशाला आवश्यक रहेकाले सरकारसँग जग्गा माग गर्ने निर्णय गरेको हो ।
बैठकले जग्गा प्राप्तिका लागि सरकारसँग समन्वय गर्न एन्फाका उपाध्यक्ष दीपक खतिवडाको संयोजकत्वमा उपाध्यक्ष दावा लामा र कार्यसमिति सदस्य मनिष जोशी सदस्य रहेको समिति गठन गरेको छ ।
केही दिनअघि एन्फा अध्यक्ष पंकज विक्रम नेम्वाङसहितको टोलीले प्रधानमन्त्री केपी शर्मा ओलीलाई भेट गरी सुविधा सम्पन्न फुटबल रंगशालामा आवश्यक रहेको बताउनुभयो । एन्फाका प्रवक्ता सुरेश शाहले भन्नुभयो, “ यसअघि प्रधानमन्त्रीसँग भेटको समयमा जग्गा आवश्यक भएकोबारे जानकारी गराएका थियौँ । अहिले सरकारलाई जग्गा उपलबध गराइदिन आग्रह गर्ने निर्णय भएको हो । जग्गा पाएपछि निर्माण थालिहाल्ने योजना छ ।”
शाहका अनुसार एन्फाले रंगशाला निर्माणका लागि उपत्यकाभित्र चार ठाउँमा जग्गा हेरेको छ । तीमध्ये कुनै जग्गा मिलाइदिन एन्फा पदाधिकारीले प्रधानमन्त्रीलाई आग्रह गरेको छ ।
जग्गा पाएमा रंगशाला बनाउन सुरुमा २२ हजार अमेरिकी डलर विनियोजन गर्ने निर्णय समेत एन्फाले गरेको छ ।
एन्फाले सुविधासम्पन्न रंगशाला बनाउन ४ अर्ब रुपैयाँ लाग्ने अनुमान गरेको छ । हाल नेपालसँग रहेको एकमात्र रंगशाला त्रिपुरेश्वरस्थित दशरथ रंगशाला हो । तर, यही रंगशालाको पनि संरक्षण र मर्मतसम्भार गर्न नसक्दा नेपालमा हुनुपर्ने अन्तर्राष्ट्रिय खेलहरु पनि विदेशमा नै हुने गरेको छ ।
एन्फाको बैठक अनुसार दशरथ रंगशालामा एन्फाबाटै रेखदेख, संरक्षण, मर्मत तथा परिचालनका लागि नेपाल सरकार युवा तथा खेलकुद मन्त्री र राष्ट्रिय खेलकुद परिषदका सदस्य सचिवसँग माग गर्ने निर्णय गरेको छ ।
