१६ असोज, काठमाडौं । हिन्दुहरूको महान पर्व दशैंको आगमनसँगै जनकपुरधाममा अवस्थित प्रसिद्ध राजदेवी मन्दिरलाई विशेष रूपमा सिँगार्न थालिएको छ । हरेक वर्ष दशैंको समयमा देवी दुर्गाको विशेष पूजा र आराधना गरिने हुँदा यस मन्दिरमा यस पटक पनि भव्य तयारीका साथ सिँगार्न थालिएको हो । 

मन्दिर व्यवस्थापन समितिले विगतका वर्षभन्दा उत्तम तयारी गरेर पर्यटकहरुको आर्षणको केन्द्र बनाउनमा जोड दिँदै मन्दिरलाई आकर्षक रूपमा सिंगार्न विशेष योजना बनाएको छ । मन्दिरको मुख्य प्रवेशद्वारदेखि गर्भगृहसम्मका क्षेत्रहरूमा विशेष सजावटको काम भइरहेको छ । रङ्गीन बत्तीहरू, विद्युत बल्ब, झिलिमिली प्रकाशहरू र फूलमालाहरूले मन्दिरको शोभा बढाउने खालका सजाउवट हुँदैछ भने मन्दिरभित्र फूलमालाका विशेष तोरणहरू बनाइएका छन् । स्थानीय फूलका साथै विभिन्न स्थानबाट ल्याइएका आकर्षक प्लाष्टिकका फूलहरूले मन्दिरको शोभा बढाउने छ । मूल मूर्तिलाई विशेष रूपमा सजाइनेछ, जसले देवीको सौन्दर्य र श्रद्धालुहरूको भक्ति झल्काउँछ । भक्तजनहरूको सुविधाका लागि मुलपूजा, कालरात्री पूजा, सुरक्षा, महाप्रसाद, खोइँच भराईसिंगार, लाइन व्यवस्थापन, रावण दहन, खाना, विजय जुलुस, रमाइलो मेला, मन्दिर परिसरमा स्वच्छता र सरसफाइ गरी १३ संयोजक समतिको व्यवस्था तथा ५० जना स्वयंसेवक परिचालन गर्ने व्यवस्था मिलाइएको छ ।

राजदेवी मन्दिर जनकपुरधामको एक प्रमुख धार्मिकस्थल हो, जसले यस क्षेत्रमा मात्र नभई देशभरका श्रद्धालुहरूलाई आकर्षित गर्छ । दशैंको समयमा विशेष गरी महाअष्टमी र महानवमीका दिन यहाँ ठूलो सङ्ख्यामा भक्तजनको उपस्थिति रहन्छ । 

मन्दिर मिथिला क्षेत्रमा उच्च धार्मिक महत्व राख्ने स्थलको रूपमा परिचित छ । विशेष गरी दशैंमा यहाँ देवी दुर्गाको शक्ति र साहसको प्रतीकका रूपमा विशेष पूजा अर्चना हुन्छ । मन्दिरमा आउने भक्तजनले देवीको पूजा गर्दै आफ्नो मनोकामना पूरा हुने विश्वास राख्छन् । दशैंको समयमा यहाँ आउने हजारौँ श्रद्धालुले आफ्नो परिवार र समाजको कल्याणको कामना गर्दै विशेष पूजा गर्ने गर्छन् । 

स्थानीय प्रशासन र मन्दिर व्यवस्थापन समितिबीच भएको सहमति अनुसार मन्दिर क्षेत्रमा प्रहरीको विशेष टोली परिचालन हुनुको साथै सीसीटीभी क्यामेरा जडान गरेर सुरक्षा निगरानीलाई अझ सुदृढ बनाउने तयारी भइरहेको राजदेवी मन्दिर व्यवस्थापन समति तथा महावीर युवा कमिटीका अध्यक्ष अजयकुमार गुप्ताले बताउनुभयो । 

दशैंको अवसरमा राजदेवी मन्दिरको साजसज्जा र भक्तजनको भिडले जनकपुरधामलाई धार्मिक तथा सांस्कृतिक केन्द्रको रूपमा पुनःस्थापित गर्नेछ ।