कार्तिक ४, काठमाडौँ । हिन्दु राष्ट्र स्वभिमान जागरण अभियानले पशुपति क्षेत्र विकास कोषको बेथितिको बारेमा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेलाई जानकारी गराएको छ । आइतवार मन्त्री पाण्डेलाई भेटी अभियानकर्ताहरुले ध्यानाकर्षण गराएका हुन् ।
अभियानका पदाधिकारीहरूले आज मन्त्री पाण्डेलाई भेटेर त्यहाँको बेथितिको बारेमा लिखित रूपमा जानकारी गराउँदै त्यसको समाधानका लागि आग्रह गरेको अभियानका महासचिव देवेश झाले बताउनुभयो ।
पशुपति क्षेत्र विकास कोषको मातहतमा रहेको त्रिशूलरडमरु अकिंत जग्गालाई मदर टेरेसा ट्रस्ट अन्तर्गत पर्ने मिशनरी अफ च्यारिटी चर्च (मित्रपार्क), ज्ञानेश्वर चर्च (कालोपुल) सञ्चालन गर्न दिएको दाबी अभियानले गरेको छ ।
कालोपुलको ज्ञानेश्वर चर्चलाई स्थानीय हिन्दु समाजबाट सञ्चालन रोक लगाएपछि तत्कालीन संस्कृति, पर्यटन तथा नागरिक उड्डयन मन्त्री सुदन किराँतीबाट फेरि सञ्चालनमा ल्याएको जानकारी समेत मन्त्री पाण्डेलाई गराएको महसचिव झाले बताउनुभयो ।
त्रिशूलरडमरु छाप अंकित गुठी क्षेत्र अन्तर्गत पर्ने विजयनगरमा मस्जिद सञ्चालन गर्न दिएको, भगवान् पशुपतिनाथ मन्दिरमा शिवलिंग अभिषेक भइरहेको देख्ने गरी फोटोग्राफ लिने गरी फ्रेन्डस् पार्क बनाई दिएको, सर्वोच्च अदालतबाट निषेध भए पनि पाशुपत क्षेत्रभित्र रहेको मृगस्थलीमा इसाईहरूलाई चिहान बनाउन दिएको दाबी पनि अभियानले पेस गरेको छ ।
अभियानको संयोजक पूर्व प्रधानन्यायाधीश गोपाल पराजुलीले गर्नुभएको छ ।
