५ कार्तिक, काठमाडौं । नेपालले अमेरिकाविरुद्धको तीन खेलको टी–२० अन्तर्राष्ट्रिय क्रिकेट शृङ्खलामा पहिलो ‘क्लिन स्विप’ गरेको छ। 

सोमवार सम्पन्न भएको डालासस्थित ग्रान्ड प्रेरि क्रिकेट मैदानमा शृङ्खलाको तेस्रो तथा अन्तिम खेलमा नेपाली टोलीले कुनै पनि टोलीविरुद्ध पहिलो पटक सिरिज ‘क्लिन स्विप’ गरेको हो।

आज सम्पन्न भएको खेलमा अमेरिकालाई आठ विकेटले पराजित गर्यो । टक्सासस्थित ग्रान्ड प्रेरी स्टेडियममा टस जिती पहिले ब्याटिङको निर्णय लिएको अमेरिकाले निर्धारित ओभरमा पाँच विकेट गुमाएर एक सय ५६ रन बनाएको थियो। अमेरिकाका लागि सैतेजा मुकामलाले ६८ रन बनाउँदा मिलिन्डा कुमारले ४३ रन बनाए। त्यस्तै एरोन जोनेसले १३ रन तथा हर्मित सिंहले १० रन बनाएका थिए। नेपालका लागि सोमपाल कामीले ३ विकेट लिएका थिए।

जवाफी ब्याटिङमा ओर्लिएको नेपालले १८.४ ओभरमै केवल दुई विकेट गुमाएर विजय लक्ष्य पुरा गर्यो ।  नेपालको सहज जितमा आसिफ शेखले ५० रनको अर्धशतकीय इनिङ खेल्दा कुशल मल्ल ४४ रनमा अविजित रहे भने उनलाई कुशल भुर्तेलले ४० रन बनाएर अविजित साथ दिएका थिए।

त्यसअघि ओपनर अनिल साह १३ रनमा आउट भए। अमेरिकाका लागि जुनायो ड्रयसडाली र जसदिप सिंहले समान १–१ विकेट लिए।

यसअघि खेलिएको पहिलो खेलमा नेपालले अमेरिकालाई १७ रनले पराजित गरेको थियो । शृङ्खलाको दोस्रो खेलमा नेपाली टोलीले अमेरिकालाई ‘सुपर ओभर’ मा हराएको थियो। निर्धारित ओभरको खेल बराबरीमा सकिएपछि ‘सुपर ओभर’ बाट हार–जितको निर्णय निकालिएको थियो ।