२० कार्तिक, काठमाडौं । नेपालमा डेंगु संक्रमणको प्रकोप बढ्दै जाँदा गण्डकी प्रदेश सबैभन्दा बढी प्रभावित भएको छ ।
स्वास्थ्य तथा जनसंख्या मन्त्रालयको पछिल्लो तथ्याङ्क अनुसार यसवर्ष गण्डकी प्रदेशमा १३ हजार ८९८ जना संक्रमित भेटिएका छन्, जुन देशभरका कूल संक्रमितको झण्डै ५० प्रतिशत हो । गण्डकी प्रदेशमा डेंगुका कारण ८ जनाको मृत्यु भइसकेको छ । देशभर भने डेंगुबाट १२ जनाको मृत्यु भएको छ ।
डेंगु संक्रमणको प्रकोप बढ्दै जाँदा ६ जिल्ला उच्च जोखिममा परेका छन् । कास्की जिल्लामा ७ हजार १६१ संक्रमित फेला परेका छन् भने तनहुँमा २ हजार २२६ जना संक्रमित भेटिएका छन् । काठमाडौंमा ४ हजार ३१३ र ललितपुरमा १ हजार १११ संक्रमित भेटिएका छन् भने पर्वतमा १ हजार ६७७ र चितवनमा १ हजार ९९ संक्रमित पुष्टि भएका छन् ।
इपिडिमियोलोजी तथा रोग नियन्त्रण महाशाखाका अनुसार यसवर्ष २८ हजार २१२ संक्रमित भएका भएका छन् । काठमाडौँ उपत्यकामा पनि संक्रमणको दर उच्च रहेको छ ।
टेकु अस्पतालका चिफ कन्सल्टेन्ट फिजिसियन डा. विमल शर्मा चालिसेका अनुसार केही बिरामीहरूमा दोहोरो संक्रमण देखिएको छ । यस्ता बिरामीहरूलाई आईसीयूमा राखेर उपचार गर्नुपरेको छ । उनका अनुसार अघिल्लो वर्षको संक्रमित लामखुट्टेका अण्डाहरू विकसित भएर यो वर्ष डेंगु फैलिएको हो ।
इडिसीडीका कीटजन्य रोग नियन्त्रण शाखाका प्रमुख डा. गोकर्ण दाहालका अनुसार यो वर्ष गण्डकी प्रदेशका तीन जिल्ला ‘हटस्पट’ बनेका छन् । उनका अनुसार कुनै क्षेत्रमा डेंगु फैलिने यकिन अनुमान गर्न नसकिएता पनि फागुन–चैतमा देखिएको संक्रमितको संख्याले असार–साउनको संक्रमण दरको पूर्वानुमान गर्न सकिन्छ । तर कुन क्षेत्रमा डेंगु फैलिन्छ भनेर यकिन गर्न भने सकिंदैन ।
स्वास्थ्य विज्ञहरूले डेंगु नियन्त्रणका लागि समुदाय स्तरमा सचेतना र लामखुट्टेको वृद्धि रोक्ने खोज तथा नष्ट अभियानलाई तीव्रता दिनुपर्ने सुझाव दिएका छन् । विशेष गरी जोखिम समूहका व्यक्तिहरूलाई विशेष सावधानी अपनाउन आग्रह गरिएको छ ।
