आमाको हत्या गरेको आरोपमा एकजना पक्राउ
२० कार्तिक, काठमाडौं । जिल्ला प्रहरी कार्यालय काभ्रेपलान्चोकले आमाको हत्या गरेको आरोपमा एक जनालाई पक्राउ गरेको छ। जिल्ला प्रहरी प्रमुख प्रहरी उपरीक्षक बसुन्धरा खड्काका अनुसार अपराधिले कार्तिक १६ गते सुन र नगदका लागि ६९ वर्षीय आफ्नै आमाको हत्या गरी फरार रहेकालाई कार्तिक १८ गते प्रहरीले पक्राउ गरेको हो ।
मङ्गलवार पत्रकार सम्मेलनको आयोजना गर्दै प्रहरीले आफ्नै आमाको हत्या गरेको आरोपमा जिल्लाको रोसी गाउँपालिका–३ का २८ वर्षका फुर्साङ लामालाई सार्वजनिक गरेको हो।
घटनाको अनुसन्धानको क्रममा फुर्साङले आमाले लगाएको सुन र पैसा लिनको लागि लोरो, झ्याल र ढोकाको आग्लोले हानेर हत्या गरेको खुलासा भएको छ ।
आफुसँग भएको चौध सय रुपियाँबाट काठमाडौँको कोठाको भाडा तिर्न नपुग्ने र आफूलाई चाहिने खर्च नटर्ने भएपछि खाना खाएर सुतेकी आमालाई लोरोले दुई पटक झ्यालको आग्लोले हानेको र झ्यालको आग्लो भाँचिएपछी ढोकाको आग्लोले हानेर हत्या गरेको पाइएको प्रहरी उपरीक्षक खड्काले बताउनुभयो ।
आमाको हत्या आरोपमा पक्राउ परेका फुर्साङको साथबाट नगद नौ हजार नौ सय रुपियाँ र २०६९ सालमा आमाको कानमा लगाएको रिङको बिल फेला पारेको प्रहरीले बताएको छ ।
प्रहरी उपरीक्षक खड्काले घटनाको अनुसन्धान गर्ने क्रममा फुर्साङले आमाको हत्या गरेपछि घर पछाडि खाल्डो खनेर पुरेको अवस्थामा सुन र रगत लागेको तीन हजार रुपियाँ फेला पारेको बताउनुभयो।
