२१ कार्तिक, काठमाडौं । शुद्धता र आपसी सद्भावका रूपमा प्रचलित छठ पर्वको अवसरमा पशुपति क्षेत्रको गुह्येश्वरी मन्दिरबाट–गौरीघाट चोकसम्म झिलीमिली बत्ती राखिनुको साथै वागमती किनारलाई सजाएर पूजाका लागि छठ घाट निर्माण तथा सरसफाइ कार्य लगभग अन्तिम चरणमा पुगेको छ ।  

पछिल्ला वर्षमा काठमाडौं लगायत देशैभरी छठ मनाउन थालिएको छ । भोली अस्ताउँदो सूर्यलाई अर्घ दिएर छठको विशेष पूजा आराधना हुँदैछ । सूर्य उपासना परम्पराको मोहक पद्धति मानिएको संसारमा यही नै यस्तो पर्व हो जसमा अस्ताउँदो र उदाउँदो सूर्यको पूजा गरिन्छ । वैदिक साहित्यको मुख्य सार सूर्य उपासना नै हो । वेदमा सूर्यलाई ऐश्वर्यका रूपमा र ऋगवेदमा सूर्यलाई नै सबै देवताको स्रोत मानिएको छ । सृष्टिका सबै जीव र वनस्पति सूर्यको तापबाट नै बाँचेका छन् । ऋगवेदमा भनिएको छ, “सूर्य आत्मा जगतस्य स्थुपश्च” अथर्ववेदमा त सूर्यलाई ब्रह्मको साकार रूप नै मानिएको छ ।

छठ पर्वले एक ठाउँमा भेला गराएर साँचो अर्थमा समान व्यक्तित्वको आदर्शसमेत स्थपित गर्दछ । यही आस्था र विश्वासले यहाँका इतिहास वर्णित जलाशयलाई सरसफाइ गरी बेहुली झैँ सिङ्गारिएको छ । आस्थाको महापर्वका रूपमा छठ पर्व वर्षमा दुईपटक मनाउने गरिन्छ । शरद् ऋतुको कार्तिक षष्ठीका दिन र अर्को वसन्त लागेको चैत महिनाको षष्ठीका दिन मनाइने गरिन्छ ।

भोलि हुने छठपर्वका लागि काठमाडौंका आठ स्थानमा छठघाट निर्माण गरिएको छ । काठमाडौँ महानगरपालिकाका अनुसार गौरी घाट, कोटेश्वर दोभान, कमल पोखरी, वंशीघाट,  बालाजु बाइसधारा, धौखेल खोला,  कुमारी क्लब र भुवनेश्वरी मन्दिरमा छठ पर्व मनाइन लागिएको हो ।  

छठ पर्वको आस्था र महत्व बोध भएको कारणले सरकारले पनि भोलि सार्वजनिक विदा दिइएको छ ।