२७ कार्तिक, काठमाडौं । गण्डकीका प्रदेशसभा सदस्य एवं पूर्वमन्त्री दीपक मनाङे (राजीव गुरुङ) लाई प्रहरीले पक्राउ गरेको छ । सर्वोच्च अदालतबाट ज्यान मार्ने उद्योगमा कसुर ठहर  भएपछि मंगलवार बिहान उहाँलाई राजधानीको कम्फर्ट हाउजिङ सितापाइलाबाट पक्राउ गरेको हो ।

सर्वोच्च अदालतले कात्तिक २० गते सांसद मनाङेलाई ज्यान मार्ने उद्योगमा दोषी ठहर गरेसँगै उच्च अदालत पाटनले उहाँलाई ज्यान मार्ने उद्योगमा ५ वर्ष कैदको फैसला सुनाएको थियो । सर्वोच्चले पनि पाँच वर्ष कैदको फैसला सुनाएको थियो । 

२०६१ सालमा ठेक्कापट्टा र असुली धन्दामा कुरा नमिलेपछि मनाङे समूहले अर्का गुण्डा नाइके चक्रे मिलन समूहमाथि आक्रमण गरेको थियो ।  चक्रे मिलनको तरबारले हात छिनाएको घटनामा संलग्न मनाङेलाई ज्यान मार्ने मनसायले आक्रमण गरिएको भन्दै उहाँमाथि जिल्ला अदालत काठमाडौँमा मुद्दा दर्ता भएको थियो । तर जिल्ला अदालतले सामान्य कुटपिट मात्रै भएको भन्दै मनाङेलाई २ वर्ष मात्र कैद सजाय सुनाएको थियो । 

ज्यान मुद्दामा मनाङे २०७५ साल पुषमा थुनामा बस्नुभएको थियो । 

मुद्दा सर्वोच्चमा २०७५ फागुन ३ गते सुरु भएको थियो । उहाँले थुनाबाटै पुनरावेदन गरेपछि सर्वोच्च अदालतले २०७५ साल पुष ६ गते धरौटी राखेर उहाँलाई थुनामुक्त गर्न पत्र लेखेको थियो । त्यसपछि मनाङे जेल बाहिर रहेर मुद्दा लड्दै आउनुभएको थियो।